Na-stroke dayon na-coma hinungdan sa kamatayon sa Santo Papa

CEBU, Philippines — Gikataho nga stroke gisundan sa coma ug irreversible cardio circulatory collapse ang hinungdan sa kamatayon ni Pope Francis niadtong Lunes, Abril 21, 2025 matud sa  direktor sa Directorate of Health and Hygiene sa Vatican City State.

Gibutyag sa Vatican News nga ang opisyal nga medical certification sa Santo Papa giisyu ni Professor Andrea Arcangeli, director sa Directorate of Health and Hygiene sa Vatican City State ug gipagawas ang report sa Holy See Press Office niadtong Lunes sa gabii.

Base sa medical report, ang 88-anyos nga pontiff adunay prior history sa acute respiratory failure tungod sa multi-microbial bilateral pneumonia, multiple bronchiectases, high blood pressure ug type II diabetes.

Human sa pagpagawas sa medical report sa pontiff, ang camerlengo niini nga si Cardinal Kevin Farrell maoy responsable sa ritual sa certification sa iyang kamatayon.

Gikataho nga sa nilabay’nga mga siglo kon mamatay ang usa ka Santo Papa kompirmahon sa camerlengo ang kamatayon niini pinaagi sa pagtapik sa iyang ulo gamit ang silver nga martilyo sa tulo ka higayon ug pagtawag sa iyang binunyagang pangalan.

Apan karon, matud sa Vatican nga ang maong ritual wala na gamita tungod kay ang pagkompirma sa kamatayon sa Santo Papa usa na lang ka yano nga proseso nga naglakip sa doktor ug death certificate nga walay autopsy nga gihimo sama sa kamatayon ni Pope John Paul II niadtong 2005 nga gipamatud-an pinaagi sa ECG.

Sa samang pamaagi, ang kamatayon ni Pope Francis gikompirma pinaagi sa electrocardiographic thanatography, usa ka specialized ECG recording nga gigamit pagpamatuod nga ang kasing-kasing hingpit nga nihunong sa pagpitik ug wala nay timailhan sa kinabuhi.

Gawas sa pagkompirma, si Farrell usab maoy mangulo sa mga ritual sama sa pag-lock ug pagsilyo sa pinuy-anan ni Pope Francis, pagguba sa iyang sing-sing ug lead seal, ug uban sa tulo ka assisting cardinals maoy magtakda sa mourning schedule sa Pope lakip ang petsa sa haya ug paglubong.

Ang mourning period kasagarang molungtad og siyam ka adlaw nga magsugod tali sa ika-upat ug ika-unom nga adlaw human sa kamatayon sa Santo Papa.

Ang lawas ni Pope Francis ibalhin sa St. Peter's Basilica karong Miyerkules sa alas 9:00 sa buntag aron didto ipahimutang hangtud sa iyang lubong sa Sabado sa alas 10:00 sa buntag diin dad-on kini balik sa Basilica of St. Mary Major diin adton siya ilubong.

Nunot niini, gipagawas usab sa Vatican ang spiritual testament ni Pope Francis nga penetsahan og Hunyo 29, 2022 diin nihangyo kini nga ilubong sa Basilica of St. Mary Major sa Roma ug ilubong sa yuta, yano, walay partikular nga dayan-dayan nga nagdala lang sa inskripsiyon sa iyang papal nga ngalan sa Latin nga Franciscus

Samtang ang mga Sugboanong magtuto padayong nagbangutan sa pagtaliwan sa Santo Papa. Si Talisay City Mayor Gerald Anthony Gullas, Jr. nanawagan kini sa pag-ampo alang sa kapahulayang dayon ni Pope Francis. (Gie-Ann N. Tapic, Rowena D. Capistrano ug Gabriel C. Bonjoc/BDB) BANAT NEWS