Pagbalhin sa renewable energy sa nasud gitinguha

CEBU, Philippines — Sa pagsaulog sa Earth Day kagahapon, Abril 22, 2025 nanawagan ang Department of Environment and Natural Resources (DENR) alang sa kolektibong aksyon ug malungtarong mga buhat aron masuportahan ang pagbalhin sa nasud ngadto sa limpiyo ug renewable energy.

Karong tuiga, ang Earth Day adunay tema nga “Our Power, Our Planet,” nga naghatag og gibug-aton sa papel sa katawhan sa pagtukod og kaugmaon nga nakabase sa limpiyo ug renewable energy.

"The Philippines is blessed with rich natural resources, including over 30 million hectares of land, 220 million hectares of marine waters, and more than 56,000 species found both on land and in the sea", matud ni Secretary Maria Antonia Yulo Loyzaga kinsa nipadayag nga ang Earth Day naghatag og kahigayonan sa pagpakita sa giambitan nga responsibilidad sa matag usa sa pag-amping ug pagpanalipod sa kalikupan.

Matud ni Loyzaga nga ang pagbalhin ngadto sa renewable energy usa ka komplikadong proseso tungod kay nagkinahanglan kini og mainampingong paggamit sa mga tinubdan sama sa tubig alang sa hydropower, kainit gikan sa yuta alang sa geothermal energy, ug hangin ug kahayag sa adlaw alang sa solar energy.

Ang paggamit usab niini nga mga tinubdan adunay social ug economic costs.

Si Loyzaga nagkanayon nga ang transition kinahanglang patas ug makiangayon ug suportado sa responsable ug malungtarong paggamit sa mga importanteng minerals nga gikinahanglan alang sa produksiyon sa enerhiya.

"As we honor Earth Day, let us remember that moving toward clean energy depends on working together. We need to make sure that no one and no ecosystem is left behind as we strive for a sustainable, inclusive, and resilient future", dugang ni Loyzaga. BDB BANAT NEWS