Pribadong luna sa Buhisan paliton sa Cebu City

CEBU, Philippines — Gipasiugdahan ni Cebu City Mayor Raymond Alvin Garcia ang pagpalit sa pribadong luna sa Barangay Buhisan aron maoy himuon nga kabalhinan sa Buhisan Elementary School ug high school tungod sa mga pagpangliki sa mga edipisyo diin peligro kini sa mga tinun-an ug mga magtutudlo.

“My direction was already to start the process for the purchase of the property so that we can finally transfer the school there, where it is safe and not susceptible to landslides”, matud ni Garcia.

Ang pangulo sa Local School Board nga si Atty. John Jigo Dacua mao ang gitahasan ni Garcia aron maoy moatiman sa pagproseso sa pagpalit sa upat ka ektarya nga luna nga nagkantidad ngadto sa P5,000 matag metro kwadrado.

Dugang mando ni Garcia nga makignegosasyon ug mohangyo sa tag-iya sa luna nga paubsan pa ang presyo sa matag metro kwardrado.

Gikataho nga sigurado na usab si Garcia nga paliton ang maong luna ug gipasalig niya nga adunay igong pundo ang gobiyerno aron mapalit ang maong luna apan malaomon gihapon kini nga makahangyo sila sa tag-iya sa presyo sa matag metro kwadrado.

Kasamtangang gipaubos sa state of emergency ang Buhisan Elementary ug high school sukad pa niadtong buwan sa Marso niining tuiga ug gipadayon ang pagpahigayon og klase pinaagi sa modular nga pamaagi aron dili kini maulahi sa hinapos nga school year. BDB BANAT NEWS