Mga armado namatikdan human napusilan si Kerwin Espinosa

CEBU, Philippines — Nikatap sa social media ang mga hulagway sa presensiya sa dili momenus lima ka mga armadong tawo sa covered court sa Barangay Tinag-an, Albuera, Leyte human si mayoral candidate Rolan "Kerwin" Espinosa gipusil niadtong Abril 10, 2025.

Ang maong mga lalake gituohang miyembro sa kampo ni Espinosa sanglit upat kanila ang nagsul-ob og blue ug white t-shirts nga dunay printa nga Bando Espinosa Pundok Kauswagan (BEPK) nga iyahang lokal nga partido.

Usa ka Facebook page nga gitawag og Maskara ang ni-share sa mga hulagway niadtong Abril 18, nagpakita sa maong mga tawo nga nagkupot og mga armas human nakita si Espinosa nga samdan.

Susamang insidente ang nakuha sab sa closed-circuit television(CCTV) sa Barangay Tinag-an.

Dunay netizens nga wala na nagpahingan ang nakapangutana ngano nga ang mga tawo ni Espinosa armado bisan sa implementasyon sa comelec gun ban.

Ang COMELEC gun ban gipatuman sukad niadtong Enero 12, 2025 ug matapos Hunyo 11, 2025.

Sa pagkutlo ning balita ang lima ka mga tawo pabilin nga wala mailhi.

Naa say mga pangutana kun si Police Major Angelo Sibunga, Hepe sa Albuera Police, ni-review sa CCTV footage sa barangay.

Dunay unverified reports nga nitumaw nga matud pa ang maong hepe nakit-an kuyog ang mga tawo nga nagsul-ob og BEPK T-shirts dihang gipangutana ug gidakop ang pito ka mga police officers nga giingong persons of interest sa pagpusil kang Espinosa.  Ang pito giingong naa sa private beach nga nahimutang 100 meters gikan sa gymnasium sa Barangay Tinag-an dihang nahitabo ang insidente.

Nagnegatibo ang pito ka mga police sa gunpowder residue sa gihimong paraffin test ug naa karon sa kustodiya sa Leyte Police Provincial Office.

Samtang padayon nga nagpaalim sa samad nga naangkon si Espinosa, Sa Facebook Live niini niadtong Dominggo, Abril 20, sigon ni Espinosa i-ampo nalang niya ang mga responsable sa suway nga pagkutlo sa iyahang kinabuhi.

“Sa unang panahon, dili mahitabo nga magpa-utang ko. Labi na sa nahitabo sa akong kaugalingon nga ako na gyud mismo ang napusilan. Pero wala gyud na moabot sa akong huna-huna, sa akoang kasing-kasing ang pag-baws. I-ampo na lang nako sila nga pasaylo-on sila sa ilang binuhatan", matud ni Espinosa.  MEL BANAT NEWS