Dos anyos nga bata nadumbolan patay sa Consolacion   

CEBU, Philippines — Kaso nga reckless imprudence resulting to homicide ang gipasaka batok sa drayber sa Ford Ranger nga nakadombol patay sa 2 anyos nga batang babaye sa driveway atubangan sa usa ka fast food chain sa Barangay Tayud, Lungsod sa Consolacion alas 7 pasado sa miaging gabii.

Ang biktima molopyo sa maong dapit ug ang suspetsdo nga nakadasmag mao si Franklin Barijnan, 49 anyos, molopyo sa Barangay Cotcot, Lungsod sa Liloan.

Ang imbestigador sa traffic section sa Consolacion Police Station nga si Police Staff Sergeant Adalim Gemini, miingon nga ang sakyanan nga gimaneho ni Barijnan paingon mosulod sa drive thru sa maong fast food chain ug aksidente nga nadombolan ang bata.

Matud pa ni Gemini nga dali nga gidala ang biktima ngadto sa UCMed Hospital sa Siyudad sa Mandaue apan paglabay sa pipila ka oras gideklarar nga nakabsan gayod kini sa iyang kinabuhi.

Samtang patay ang usa ka security guard samtang duha ang angol sa nahitabong disgrasya sa Barangay Mangga, Lungsod sa Tuburan sa maiging adlaw.

Ang nakalas mao si Darwin Senillo Aspacio, 22 anyos, security guard nga detailed sa Mandaue City apan lumad nga taga Barany Guihop, La Libertad, Negros Oriental.  Si Aspacio maoy angkas sa motorsiklo nga Yamaha MT 15 motorcycle, color Black/Gray nga gimaneho ni Rodil Parot Labangon, 27 anyos, electrician, taga Barangay Cogon, Lungsod sa Tuburan ug talandugon ang kahimtang. 

Samtang angol sab ang driver sa private tricycle nga si Jojie Julapon Montebon, 57 anyos, residente sa Barangay Mangga, Tuburan.

Sa impormasyon sa Tuburan Police Station, ang private tricycle nagdagan paingon sa norte nga bahin ug nagsunod ang Yamaha MT 15 nga gisakyan nilang Labangon ug Aspacio ug kalit ni overtake ang motorsiklo sa tricycle.

Apan nakabantay ang driver sa motor sa nagpadulong nga Toyota Hi-Ace Garandia Van color white hinungdan nga nibalik kini sa iyang lane apan aksidenteng naigo ang handlebar sa tricycle.

Tungod niini si Labangon ug Aspacio nalabay sa pikas lane apan si Aspacio aksidente nga nalatayan sa Toyota Hi-Ace Van.

Ang mga naangol gidala sa Tuburan District Hospital apan si Aspacio gideklarar nga dead-on-arrival ug si Labangon talandugon ang kahimtang ug gibalhin sa Balamban Provincial Hospital. (BANAT NEWS)