Payout sa TUPAD ihunong una sa DOLE

CEBU, Philippines — Gianunsiyo sa Department of Labor and Employment (DOLE) Central Visayas nga temporaryo una nilang suspensuhon ang payout sa ilang "Tulong Panghanapbuhay ng ating Disadvantaged/Displaced Workers (TUPAD)" Program kini bisan paman og nakakuha sila og exemption sa Commission on Elections(COMELEC) ban.

Suma pa ni DOLE-7 Regional Director Atty. Roy Buenafe nga mohunong sila sa pag-implementar sa TUPAD payout gikan sa Mayo 2 hangtod sa Mayo 13, 2025.

Matod sa Director nga ang maong lakang gihimo aron maprotehian kini sa mga politiko nga gamiton ang TUPAD sa ilang kaugalingong interest ug aron mas mokusog ang kampanya niini sa umaabot sa eleksiyon.

"Tungod kay gilikayan nato nga maapil ta sa kontrobersiya sa election. Ingnon nya ta ug vote-buying ba hinoon o unsa diha", dugang ni Director Buenafe.

Asoy sab ni Buenafe nga dili kalikayan nga makig-alayon sila sa Local Government Units aron ipang-apod-apod ang assistance sa TUPAD beneficiaries.

Sayo niini, ang DOLE-7 niimbestigar sab sa alegasyon nga deduction sa TUPAD grants sa Lapu-Lapu City.

Ang TUPAD usa ka 10-day cash-for-work program sa DOLE alang sa displaced ug disadvantage workers. (BANAT NEWS)