PhilHealth dunay benepisyo alang sa mga sakit sa ting init
CEBU, Philippines — Tungod sa nagkagrabeng kainit, gipahinumdoman sa Philippine Health Insurance Corp. (PhilHealth) sa Central Visayas ang publiko nga mahimo silang mopahimulos sa inpatient benefit packages kon makasinati sa kasagarang mga summer-related illnesses.
Base sa datos sa Department of Science and Technology - Philippine Atmospheric, Geophysical and Astronomical Services Administration (DOST-PAGASA), ang heat index forecast sa Abril 21, 2025, misaka ngadto sa 38°C sa mga lugar sama sa Cebu ug Bohol, nga anaa na sa extreme caution nga lebel.
Taliwala sa hulga nga dala sa kainit, gisiguro sa PhilHealth nga dunay tabang nga mapahimuslan ang mga miyembro.
Alang sa mga kondisyon nga heat stroke, heat exhaustion, heat collapse, heat cramp, ug sunstroke, ang benefit package nga ilang giandam mokabat og P12,675, samtang sa heat fatigue ug uban pang epekto sa heat ug light, adunay coverage nga P18,135.
Ang mga pasyente nga adunay moderate to severe dehydration ug ang mga kaso sa varicella o chickenpox nga walay komplikasyon makadawat og P7,800 nga benepisyo.
Lakip usab ang typhoid fever nga adunay benepisyo nga P19,500, samtang ang sore eyes o conjunctivitis nga kasagarang mogawas panahon sa ting init sakop usab sa PhilHealth nga nagkantidad og P16,575.
Ang infectious diarrhea o acute gastroenteritis adunay benepisyo nga P11,700, samtang ang mga toxic effects sa pakigkontak sa mga isda ug ubang lamang dagat sama sa jellyfish, sea anemone, shellfish, ug starfish, sakop usab sa package nga nagkantidad og P11,115.
Gawas pa sa inpatient benefits, nagpasidaan usab ang PhilHealth nga ang mga miyembro mahimong maka-avail sa Outpatient Emergency Care Benefit (OECB) Package alang sa ubang acute health care needs. Kini magamit sa tanang Level 1 hangtod Level 3 nga mga ospital nga accredited sa PhilHealth.
Giklaro ni PhilHealth Acting President ug CEO Dr. Edwin M. Mercado nga bisan pa og adunay mga benepisyo sa Philhealth importante gihapon nga magmatngon ug protektahan ang kaugalingon sama sa pag-inom og daghang tubig, likayan mogawas kon init kaayo, kanunayng maghugas sa kamot ug maligo matag adlaw kon mobiyahe o dunay lakaw. (BANAT NEWS)
- Latest
