Duha ka netizens gikiha ni Gov. Garcia
CEBU, Philippines — Mipasaka og kasong cyber libel ang kampo ni Gobernador Gwendolyn Garcia batok sa duha ka mga netizens nga namasangil niya ug sa iyang pamilya nga corrupt, mangilkil ug abusado.
Ang gipasaka mao ang 10 -counts sa cyber libel batok nila ni Michael Cano nga adunay user name sa social media nga “Deen Chase” ug Efren Omayan “Dong Efren” tungod sa matud pa mga bakak nga impormasyong gipatakap sa duha batok sa iyaha ug sa iyang banay.
Si Atty. Alex Avisado, ang abogado ni Garcia nagkanayon nga ilang gisang-at ang maong reklamo ngadto sa National Bureau of Investigation sa Central Visayas (NBi-7).
“Itong mga attacks na ito against Gov. Gwendolyn Garcia are personal attacks," matud ni Avisado atol sa press conference nga gipahigayon kagahapong adlawa didto sa kapitolyo.
Apil sa mga alegasyon ang matod pa “unexplained wealth” ni Garcia, pagpalit og $10 million yacht ug suway nga pag takeover sa mga mining sites, pabrika sa semento ug mga baboyan sa Sugbo.
“All these are lies. Lahat na ito ay kasinungalingan, that is why we are here because we want to punish and hold responsible itong Michael Deen Cano and Efren Omayan for violation of Anti-Cybercrime Law,” matud ni Avisado.
Ang maong post ni Deen Chase nakakuha na og kapin 5, 200 ka reactions ug sobra 3, 200 ka shares sa Facebook kagahapong adlawa, Abril 21. Si Cano dali pud dayon mitubag sa pagpasaka og kaso sa gobernador batok kaniya.
Sa usa ka video nga iyang gi-post kagahapong adlawa, gikataw-an ni Cano ang pagpasaka og kaso ni Garcia ug nagkanayon nga wala siya mahadlok sa gobernador.
“This is the kind of Evil that Cebu is facing right now.. Just because we are raising questions and demanding transparency from her governance. She immediately does what she does best. Filing a case.. haha... kataw anan kaau ka lola uy.. The boat is sinking na noh? Kulba na? Hahaha.. you will NEVER win. The only reason siguro nga maka daog ka is if manikas ka. And isip tarong na gobernadora, you won’t do that, right?” matud ni Cano sa iyang Facebook post kagahapon.
Ang abogado ni Garcia mipasidaan sab sa publiko nga dili mo-share sa maong mga bakak nga post tungod kay matud pa apilon sila og pasakaan og kaso. (BANAT NEWS)
- Latest
