Apohan, apo nangalumos

CEBU, Philippines — Nakabsan sa kinabuhi ang usa ka 67-anyos nga apohan ingon man ang 17-anyos niini nga apo human silang duha nalumos dihang gihapak sa kusog nga bawod ang gisakyang pumpboat pasado ala-1 sa hapon kagahapon sa Barangay Manduyong, Lungsod sa Badian, Sabado de Gloria.

Ang mga namatay mao si Silvio Bajo Verano, 67 ug ang 17-anyos nga dalagitang apo nga si alyas Faith.

Sa impormasyon sa Badian Police Station nakadawat sila og tawag gikan sa concerned citizen usa ka gamay nga pumpboat ang naunlod gumikan sa kusog bawod diha sa kadagatan sa Barangay Manduyong.

Ang kapulisan sa Badian Police Station uban ang personnel sa MDRRMO Badian niresponde dayon sa insidente.

Pag-abot nila sa lugar nakuha na sa mga residente ang 17-anyos ug ang kaubang bata nga 12 anyos.

Gidala sa tambalanan si alyas Faith apan gideklarar kining dead-on-arrival samtang ang 12-anyos gitabang pa sa tambalanan atol ning pagsuwat sa balita.

Naluwas sab ang laing bata nga 14-anyos kinsa maoy nitug-an sa mga rescuers nga kuyog nila ilang apohan nga na-missing pud.

Ang rescuers nagbalik-balik pagpangita sa apohan ug nakita kini lima ka metros sa ilawom sa dagat, dali kining gihaw-as ug gidala sab sa Badian District Hospital apan  gideklarar nga dead-on-arrival.

Nagkanayon si Police Staff Sergeant Norman Aparre nangaligo og dagat ang mga bata kauban ilang apohan sakay sa pumpboat niini, apan gihapak sila og kusog nga bawod hinungdan sa pagkatikyaob niini.

Nangaratol matud pa ang mga apo ug migakos sa ilang apohan apan kay dagko ang bawod maong naglisod kini sa paglangoy ug nalumos. (BANAT NEWS)