Borgonia miatras pagpapili sa eleksyon
CEBU, Philippines — Ang kasamtangang bokal sa tersero distrito nga si John Ismael Borgonia nga buot magpapili balik pagka bokal karong umaabot nga eleksyon, ang miatras sa iyang kandidatora.
Sa sulat sa Law Department sa Commission on Elections (Comelec), gisaysay nga epektibo Marso 13, 2025 nakonsiderar na nga "withdrawn" ang sertipiko de kandidatora ni Borgonia.
Si Borgonia personal nga miduso sa iyang statement of withdrawal didto sa Office of the Provincial Election Supervisor (OPES) niadtong Marso 13 ra usab kun diin gi-verify pud niya iyang pag withdraw.
Giduso dayon sa OPES ang maong statemenf of withdrawal ni Borgonia ngadto sa Law Department sa Comelec.
Apan kay pinal naman ang Candidates Profile System (CPS) subay sa Automated Election System, dili na matangtang sa Comelec ang pangalan ni Borgonia sa official ballot ug sa certified list of candidates alang sa May 12 nga eleksyon.
"Your name will still be included therein however, you shall not be voted for, and any votes cast in your favor should be considered as stray," sumala sa sulat sa Comelec ngadto kang Borgonia, penetsahan Marso 24 nga gipirmahan sa director nga si Atty. Sittie Maimon Azisa Tawagon sa Comelec.
Si Borgonia milansar kini ubos sa One Cebu party ug magpapili unta balik isip bokal alang sa iyang ika-tulo nga termino. Ang Banat News misuway og kuha sa rason ni Borgonia sa iyang pag-atras sa iyang kandidatora, apan wala pay nadawat nga tubag sa pag sulat niining balita. (CEBU NEWS)
- Latest
