10 ka tawo nadakpan sa Oplan Huli Day
CEBU, Philippines — Napulo ka mga tawo ang nadakpan tungod sa tigbakay sa lungsod sa Dalaguete, Badian ug Cordova niadtong Biyernes Santo, Abril 18, 2025.
Gironda sa Dalaguete Police Station ang tigbakayan sa Barangay Obong sa nga miresulta sa pagkasikop sa upat ka mga indibdiwal.
Nasakmit sa kapulisan ang usa ka patay nga manok igtatari color yellow nga dunay samad ug buwang ug ubang paraphernalia ingon man P1,000.
Samtang tulo sab ka mga lalake ang nadakpan sa Badian Police Station human ilang gironda ang tigbakay sa Sitio Kang-ongos, Barangay Basak, Lungsod sa Badian.
Nasakmit sa kapulisan ang manok bihag, usa ka manok nga samdan, usa ka buwang ug P1,000 nga pusta.
Tulo sab ka tawo ang nadakpan sa Cordova Police Station tungod sa tigbakay niadtong Huwebes Santos, Abril 17.
Ang maong operasyon kabahin sa Oplan Huli Day sa kapolisan kontra tanang matang sa krimin atol sa Semana Santa.
Mag-atubang sila og kasong kalapasan sa Presidential Decree 1602 kun illegal gambling (Tigbakay) ang mga nadakpan. (CEBU NEWS)
- Latest
