Mga bus operators isyuhan og show cause order

CEBU, Philippines — Moluwat ang Land Transportation Franchising and Regulatory Board (LTFRB) og Show Cause Orders sa mga bus operators kansang mga drayber nagpositibo sa paggamit sa ilegal nga drUgas atol sa tibuok nasud nga drug screening nga gipahigayon sa Philippine Drug Enforcement Agency (PDEA).

Si LTFRB Chairperson Atty. Teofilo Guadiz III nikondena sa mga drayber nga naggamit og ilegal nga drugas ug nisaad og paspas nga aksyon aron manubag ang mga indibidwal nga nagbutang sa kaluwasan sa publiko sa peligro.

"The LTFRB will be issuing show-cause orders to the bus operators whose drivers were among those who tested positive. They will be required to explain why no sanction should be imposed upon them for employing drivers who pose a clear risk to public safety," matod ni Guadiz.

Ang mga drug test nga gihimo niadtong Abril 16 ubos sa "Oplan: Harabas" gipahigayon sa mga major land transport terminals sa tibuok nasud.

Sa 3,270 ka mga indibidwal nga gipaubos sa test, 84 ka mga drayber sa public utility vehicle (PUV) ang nagpositibo sa ginadili nga drugas.

Lakip sa nagpositibo mao ang 13 ka bus driver, usa ka mini-bus driver, 19 ka jeepney drivers, 47 ka tricycle driver, usa ka taxi driver, duha ka motorcycle taxi riders, ug 11 ka UV Express drivers.

Duha usab ka konduktor ang nagpositibo sa paggamit og ilegal nga drogas.

Sa laing bahin, gipahinumdoman ni Guadiz ang mga operator nga ilang katungdanan ang pagsiguro nga physically ug mentally fit ang ilang mga drayber sa pag-operate sa mga pampublikong sakyanan.

Ang kapakyas sa pagtuman niining mga responsibilidad mahimong moresulta sa mga penalty, lakip ang posible nga pagsuspinde o pagkansela sa ilang mga prangkisa, sumala sa LTFRB.

Dugang pa sa ahensya nga padayon sila nga nakig-alayon sa PDEA ug uban pang ahensya aron mapabilin nga luwas ug gawasnon ang mga dalan sa nasud gikan sa mga drayber nga naggamit og ginadiling drugas.