Taskforce giumol aron masulbad ang pagpamato sa SRP

CEBU, Philippines — Isip tubag sa insidente diha sa South Road Properties nga giingong dunay mga indibidwal nga mamato sa mga motorista ug ni-viral kini sa social media ang Cebu City Police Office(CCPO) pinangulohan sa ilang Acting City Director Police Colonel Enrico Figueroa ni-implementar og proactive measures aron mas mapalambo pa ang public safety and order sa SRP.

Aron matubag ang maong kabalaka, usa ka coordination meeting ang gihimo niadtong Abril 15, 2025 nga gitambungan ni Police Major Ronel Royo, Station Commander sa Police Station 5.

Nitambong sab sa maong meeting ang nagkadaiyang ahensiya nga may labot sa maong hitabo apil na ang pangulo sa Cebu City Transportation Office Raquel Arce; Captain Glen Pacheco sa Philippine Coast Guard ug Ermita Barangay Captain Mark Miral.

Niadtong Abril 16, 2025, usa ka follow-up meeting ang gihimo sa Cebu City Mayor's Office Conference Room nga gipangulohan ni Arce ug ang mga partisipante mga representante sa PROBE, SRP Patrol ug Local Government officials gikan sa Barangay Pasil ug Ermita.

Tumong niini nga mag-umol og joint task force aron mapugngan ug madakpan ang mga nalambigit nga indibidwal.

Nauyonan sab sa grupo nga tun-an pag-usab ang mga ordinansa sa dakbayan aron mag facilitate og legal action batok sa mga nakasala 

Nilusad sab og operasyon ang Joint Task Force sa SRP bridge.

Ubos sa guidance sa Carbon Police Station 5 ug pinaagi sa kolaborasyon sa CCTO, PROBE ug Bantay-Dagat malampuson nilang nakompiskar ang makeshift ladders, pisi ug improvised floatation devices. (BANAT NEWS)