Babaye patay human naligsan diha sa lungsod sa Liloan

CEBU, Philippines — Patay ang usa ka babaye nga naligsan og sakyanan atol sa paglabang niini sa dalan sa miaging Huwebes Santo, Abril 17, 2025 sa Barangay San Vicente, Lungsod sa Liloan.

Ang biktima giila sa kapolisan nga mao si Jackelyn Contado Pamoso, 38 anyos, minyo nga nagpuyo sa maong lugar.    

Si  Police Major Mawi Arcilla, hepe sa Liloan Police Station miingon nga nagdali sa paglabang ang biktima paingon sa atbang nga bahin sa karsada ug ang naghaguros nga Toyota Wagon nga gimaneho ni Miguel Anthony Mendoza, 25 anyos nga nagpaingon sa amihanang bahin sa lalawigan sa Sugbo ang kalit lang midasmag niini.      

Gumikan sa kakusog sa impact sa maong pagdasmag daw napasok ang biktima sa ilawom nga bahin sa maong sakyanan nga maoy hinungdan sa grabeng kadaut nga iyang nahiaguman.                                                                                                                                          

Dali untang gidala ang biktima ngadto sa Danao Provincial Hospital apan gideklarar kini sa mga doktor nga dead on arrival.

Si Mendoza nga gisukitsukit sa kapolisan ang mialigar nga wala kini makamatikod nga adunay milabang sa dalan ug nahingangha na lamang siya dihang kalit lang milugapak iyang sakyanan hinungdan nga siya nihunong.  Dali hinuon nga mitahan si Mendoza sa kapolisan sa Liloan Police Station ug kini temporaryong gitanggong ug gikatakda nga pasakaan og kaso karong Lunes Abril 21, 2025 sa kalapasan sa Reckless Imprudence Resulting to Homicide. (BANAT NEWS)