1,500 ka residente makatagamtam og igong suplay sa tubig sa MCWD

CEBU, Philippines — Mga 1,500 ka panimalay sa mga barangay sa Busay ug Apas, Dakbayab sa Sugbo ang makatagamtam sa luwas, igo, ug barato nga suplay sa tubig gikan sa Metropolitan Cebu Water District.

Gilusad sa  MCWD ang pipeline expansion projects ngadto sa Sitio Mahahayay, Barangay Busay ug Sitio Kalbaryo, Barangay Apas diin gikonsidera kining “uhaw” nga mga dapit tungod kay lisod ang pagmontar og linya sa tubig ang maong mga lugar.

Ug aron mas mapalapdan ang serbisyo ug masulbad ang panginahanglansa tubig gibutangan kini og extended pipeline.

Matud sa MCWD nga adunay gamay nga pagkalangan sa pagpatuman sa maong proyekto tungod kay kinahanglan nga magbutang og mga tubo sa mga pribadong dalan ug sa pipila ka mga road right-of-way ubos sa hurisdiksiyon sa Probinsiya sa Sugbo.

Giaprobahan na ni Gobernador Gwendolyn Garcia ang excavation ug pipe laying works sa mga property nga gipanag-iya sa Kapitolyo kinsa si Cebu City Mayor Raymond Alvin Garcia nihangyo nga matugotan ang maong proyekto.

Mapasalamaton si MCWD General Manager Edgar Donoso ngadto kang Mayor Garcia tungod kay padayon kining nagsuporta sa MCWD.

Gikatakdang mahuman ang pipe laying sa buwan sa Mayor niining tuiga.

Gikataho nga maggikan ang suplay sa tubig sa Lusaran bulk water project. (BANAT NEWS)