Kapolisan nisusi na sa mga terminal ug pantalan sa dakbayan

CEBU, Philippines — Gipanguluhan ni PRO-7 Regional Director Police Brigadier General Redrico Maranan ang pagpahigayon og inspeksiyon sa mga terminal ug pantalan sa siyudad sa Sugbo.

Kini aron masiguro nga hapsay ug malinawon ang pagtimaan sa Semana Santa ug suma pa ni Maranan nga kontento siya sa redeployment sa Cebu City Police Office(CCPO) nga nagmontar og Police Assistance Desk.

Naghatag sab ang PRO-7 ingon man CCPO og kit nga dunay tambal, vitamins, tubig ug uban pa ngadto sa na deploy nga mga police ingon man pasahero. Samtang gisusi usab ni Cebu City Mayor Raymond Alvin Garcia kagahapon ang mga pantalan, bus terminal ingon man simbahan.

Matud pa ni Garcia nga magpakatap siya og dugang tawo gikan sa Cebu City Disaster Risk Reduction Management Office ug mga sakop sa Philippines National Police aron maoy motabang aron mas luwas ang mga pasaherong manguli sa ilang tagsa-tagsa ka mga probinsya.

Moabot na sa 70 mil ka mga tawo ang nigawas ug nisulod sa Sugbo sugod niadtong Abril 13 hangtud niadtong Lunes.

Ang tigpamaba sa Cebu Port Authority Maryknoll Bolasa miingon nga sulod sa duha ka Domingo ug Lunes ang misulod nga pasahero miabot sa 36,926 samtang ang migawas nga mga pasahero miabot sa 41,760 diin sa kinatibuk-an 78,686 ang nisulod ug gawas sa mga pantalan sa Sugbo.

Sumala pa ni Bolasa, ang Sugbo adunay dili mominos sa 16 ka mga pantalan nga gitutukan ug gipaubos sa heightened alert.

Karong adlawa Abril 16, 2025 gipaabot ang pagdagsa sa mga pasahero ilabi na daghan sa mga trabaho ang halfday lang. Rowena D. Capistrano, Preciosa Bacalso (BANAT NEWS)