Malacañang: Government workers mag-half day lang karon
CEBU, Philippines — Gitugotan sa Malacañang ang mga buhatan sa gobiyerno sa pagpatuman sa work from home setup gikan sa alas-8 sa buntag hangtod sa alas -12 sa udto ug suspendido ang trabaho gikan sa udto sugod karong adlawa, Miyerkules Santo, Abril 16.
Matod sa Memorandum Circular 81 nga gipirmahan ni Executive Secretary Lucas Bersamin, kini gihimo aron mahatagan og kahigayonan ang mga kawani sa gobyerno nga makabiyahe ug makapangandam alang sa Semana Santa.
“To provide government employees full opportunity to properly observe Maundy Thursday and Good Friday on 17-18 April 2025, and to allow them to travel to and from the different regions in the country, the following arrangements are hereby adopted in government offices on 16 April 2025: (a) work from home from 8:00 in the morning to 12:00 in the afternoon, subject to existing laws, rules and regulations; and (b) suspension of work in government offices, from 12:00 in the afternoon onwards,” base sa MC 81.
Apan, ang mga ahensya nga nalambigit sa paghatod sa mga batakang serbisyo ug kahimsog, pagkaandam/pagtubag sa mga katalagman ug kalamidad, ug hinungdanon nga mga serbisyo magpadayon sa ilang mga operasyon ubos sa naandan nga mga arrangement sa pagtrabaho, dugang pa sa MC. Samtang, ang pagsagop sa work from home ug pagsuspenso sa trabaho alang sa mga pribadong kompanya ug opisina gitugyan sa pagbuot sa ilang mga employer.
Sa Miyerkules, gilauman nga modagsa na ang mga mobiyahe sa mga pantalan ug terminal aron mouli sa ilang probinsya sa pag-obserba sa Holy Week, nga naghandum sa Pasyon, Kamatayon ug Pagkabanhaw ni Hesu Kristo.
Samtang si Gobernador Gwendolyn Garcia sa Sugbu mipagawas og memorandum sa pagsuspenso sa trabaho sa Cebu Provincial Government karong adlawa sugod sa udto.
Buot sa gobernador nga makauli sa ilang tagsa tagsa ka mga lungsod ang mga kawani sa Kapitolyo aron pag obserbar sa Semana Santa, kutob lang alas 12 sa udto ang trabaho sa Probinsya.
Sama sa kamandoan sa Palasyo, magpabiling dunay trabaho ang mga gitahasan sa basic services ug health services, pag-andam o pagtubag sa mga emerhensiya ug ubang importante nga serbisyo sa gobyerno, magpadayon gihapong ang operasyon. (BANAT NEWS)
- Latest
