Gatusan ka residente niduso og reklamo batok sa opisyales sa Cebu City

CEBU, Philippines — Gatusan ka residente sa Dakbayan sa Sugbo ang niduso og reklamo ngadto sa Ombudsman Visayas batok sa opisyales sa siyudad kalabot sa pagpang-apod-apod niini og sinakong bugas diha sa kabarangayan.

Kalapasan sa Anti-Graft and Corrupt Practices Act, technical malversation, misconduct and conduct prejudicial to the best interest of service ang  kasong gipasaka batok kang Mayor Raymond Alvin Garcia, hepe sa Department of Social Welfare and Services Portia Basmayor ug hepe sa  City Disaster Risk Reduction and Management Office Harold Alcontin.

Matud ni Atty. Mac Gordon, abogado sa mga reklamante nga ang reklamo nagsugod kini sa privilege speech ni Konsehal Mary Ann Delos Santos kalabot sa pag-apod-apod sa mga bugas diha sa kabarangayan.

Giklaro ni Gordon nga walay bulok pamolitika ang iyang pagtabang tungod kay sa north district man siya nidagan pagka-konsehal diin tinguha lang niya nga mogawas ang kamatuoran bisan pa og dili siya makadaog sa umaabot nga eleksiyon.

Base sa pangangkon sa mga reklamante ang pundo nga giingong gigamit sa pagpamalit og bugas gikan sa City Disaster Risk Reduction and Management Office.

Ang mga reklamante nikwestiyon sa pag-apod-apod sa mga bugas bisan walay kalamidad.

Si Gordon uban sa mga reklamante nga nagpakitabang kaniya nihangyo sa Ombudsman nga imbestigahan ang maong insidente.

Gilaoman ni Gordon ug sa mga reklamante nga tagdon ug hatagan og aksiyon ang ilang reklamo aron mapalambo ang maayong panggobiyerno ug hustisya alang sa tanan.

Ang nahisgutang opisyales nga gireklamo wala pa moluwat og mga pamahayag apan.

Sayo pa, human sa nahisgutang privilege speech ni Delos Santos si Garcia nipasabot nga kini usa ka programa nga gipasiugdahan sa DSWS ug kanunay nga gihimo.

Ug matud ni Garcia nga isip ubos sa Office of the Mayor ug kabahin sa executive branch usa kini ka programa nga gilakip sa iyang buhatan. (BANAT NEWS)