3,000 ka pamilya sa Cebu City makabaton og pinuy-anan

CEBU, Philippines — Sobra sa 3,000 ka pamilya ang makabaton na og pinuy-anan kong sugdan na og tukod ang Cebu City Residential Park pinaagi sa pakigtambayayong sa kagamhanan sa Dakbayan sa Sugbo ug DEO Homes Property Development Inc..

Mao kini ang labing una nga 4PH housing project sa siyudad nga nahimutang sa Barangay Pulangbato nga usa sa mga bukirang bahin sa Siyudad sa Sugbo.

Ang maong housing project ubos kini sa Pambansang Pabahay Para sa Pilipino diin magtukod og 19 ka building ug langkuban kini ngadto 3,054 units diha sa 3.8 ektaryang  nga luna.

Kagahapon gipahigayon ang groundbreaking ceremony ug pinirmahay sa memorandum of agreement nga gipangulohan ni Mayor Raymond Alvin Garcia ug pangulo sa Deo Homes nga si Danilo Ortiz kauban ang pangulo sa Department of Human Settlements and Urban Development nga si Atty. Lyndon Juntilla, Chairman on Housing nga si Konsehal Jerry Guardo ug Congresswoman Rachel “Cutie” del Mar.

Ang beneficiaries sa maong housing project mao kadtong miyembro sa PAG-IBIG nga nangita og barato nga kapuy-an sa siyudad.

Gipasalig ni Ortiz nga sulod sa unom ka buwan aduna nay 300 ka mga pamilya ang magsugod na og pamuyo sa maong proyektong pabahay.  Gikataho nga humanon kining maong proyekto sulod sa duha ka tuig sa dili pa sugdan ang laing housing projects ngadto sa laing mga barangay sa Siyudad sa Sugbo.

Sa pagpakighinabi kang Garcia emosyonal kini nga nipadayag nga natuman na ang usa sa iyang mga tinguha isip politiko nga makapatukod og balay alang mga lumulupyo sa siyudad.

“This program is another significant step towards our shared vision—a Cebu City where every family has a safe, decent, and a dignified place to call home”, padayag ni Garcia. (BANAT NEWS)