100 ka polis nga ipadala sa mindanao gipaubos og training

CEBU, Philippines — Dako ang posibilidad nga ipadala sa Mindanao ang usa ka gatos ka mga polis sa Central Visayas nga gipaubos karon sa training sa Commission on Election alang sa gimbuhatan sa Electoral Board.

Gisugdan kagahapong adlawa ang duha ka adlaw nga pagbansay-bansay sa maong mga polis nga posibleng moserbisyo atol sa eleksyon karong Mayo 12, 2025.

Matud pa ni Atty. Francisco Pobe Jr, Regional Director sa COMELEC 7 nga sa higayon nga adunay peace and order related incident sa usa ka dapit ug mosibog ang mga magtutudlo sa pagserbisyo sa eleksyon ang mga police mao ang mohulip sa ilang responsibilidad.

Ang maong mga police gipaubos og training alang sa pag operate sa automated counting machines o ACMS.

Sa initial assessment sa COMELEC ug PNP malinawon sa kinatibuk-an ang rehiyon gawas lang sa pipila ka dapit sa Bohol ug sa Negros Oriental nga bantayanan.

Dugang pa ni Pobe, nakahibalo na daan ang mga police nga nangayo ang COMELEC og usa ka gatos nga ipadala sa mindanao ug tungod kay sila man ang nabansay sila ang ipadala didto.

Samtang hugot nga gikondenar sa COMELEC ang nahitabong pagbanhig patay kang Atty. Maceda Lidasan Abo, ang Election officer sa Datu Odin Sinsuat sa Maguindanao Del Norte kauban ang bana niini.

Ang magtiayon gibanhigan sa wala mailhing mga armadong lalaki sakay sa ilang sakyanan dihang mopadulong na kini sa iyang buhatan.

Ang magtiayon nadala pa sa tambalanan diin unang gideklarar nga dead on arrival ang bana ug pipila ka gutlo ang comelec official ang nakalas usab.

Gipadayag ni Pobe nga igo ra naghimo sa ilang trabaho ang mga comelec personnel ug gikinahanglan nga dili mokompyansa ug pahugtan pa ang pagmatngon aron malikay sa mga tawo nga adunay dautang tinguha sa ilang kinabuhi. (BANAT NEWS)