Suspek sa paglungkab og mga sakyanan sa Bohol nadakpan

CEBU, Philippines — Nadakpan sa kapolisan sa Tagbilaran City Police Station Bohol Police Provincial Office pinangulohan ni Police Lieutenant Colonel John Kareen Escober ang 30-anyos nga lalake nga suspek sa Basag-Kotse niadtong Miyerkules, Marso 26, 2025.

Ang suspetsado mao si Patrick Calvin Cruz, 30 anyos, ulitawo ug nagpuyo sa Bonga Menor, Bustos, Bulacan.

Nasayran niadtong Martes sa buntag, Marso 25, 2025 niabot sa Probinsya sa Bohol ang suspetsado.

Niabang kini og motorsiklo apan lahi ang ngalan nga iyang gigamit ug kini mao ang Vince Mendoza Perez.

Alas 12 sa udto niadtong Miyerkules dunay mga insidente sa Basag-Kotse ug gipangkuha ang mga gamit sulod sa sakyanan.

Gani sa Tagbilaran City upat ka insidente ang nahitabo sa nagkalain-laing dapit ug nakuha sa suspect ang mga gamit ug cash.

Atol sa unang insidente sa Basag-Kotse gisubay nila ang CCTV footage ug nakita nga ang suspect nigamit og motorsiklo.

Nakuha nila ang description sa motorsiklo ingon man plate number ug gipasubay nila sa Land Transportation Office Bohol kinsay tag-iya sa motorsiklo.

Nihatag og impormasyon ang kapolisan sa mayor sa Tagbilaran City ug gi-post sa social media ang description sa motor.

Pagkagabii niana, dunay niadto sa police station nga ni-claim nga siya'y tag-iya sa motorsiklo ug giabangan kini sa usa ka Vince Mendoza Perez.  Gitug-an sab sa tag-iya sa motorsiklo nga giuli sa suspetsado ang motorsiklo sa airport sa Panglao kay mosakay na kini og eroplano padung Manila.

Niadto dayon sa airport ang kapolisan apan wala na nila naabtan ang suspect hinungdan nga nitimbre sila sa Aviation Security Group.

Dihang gi-hold kini sa NAIA Terminal 3 Patrick Calvin Cruz ang paila-ila sa suspect ug dili Vince Mendoza Perez apan ang mga descriptions nga nakuha sa kapolisan nihaom ngadto sa suspect.  Miyerkules sa buntag nilarga ang kapolisan sa Manila ug gidakop ang suspetsado ug na-recover gikan kaniya ang laptop, tablet, coin purse, mga alahas, P20,000 cash ug P10, 200 nga kwarta nga gigamit bayad sa iyang plane ticket. (BANAT NEWS)