CT-TODA nitangtang sa campaign posters

CEBU, Philippines — Gipangtangtang sa mga sakop sa City of Talisay-Traffic Operation Development and Authority (CT-TODA) ang mga campaign posters nga nakatabon sa mga traffic sign.

Si Jonathan Tumulak, pangulo sa CT-TODA nibutyag nga daghan ang mga traffic sign ang gipangbutangan og dagway sa mga politiko hinungdan nga maglibog ang motorista panahon nga kini magdagan sa kadalanan sa Dakbayan sa Talisay ug posibleng makamugna kini sa disgrasya.

Gihangyo ni Tumulak ang mga politiko nga unta ilang estoryahan ang ilang mga tawo o mga tigbutang sa ilang campaign materials nga dili apilon sa pagbutang diha sa traffic signs.

Si Tumulak uban sa nagkalain-laing sektor uban ni Atty. Richleigh Consulta, election officer sa siyudad nituki sa maong isyu.

Gikatahong giuyonan ni Consulta ang pamayahag ni Tumulak nga nakamugna og risgo ug delikado sa disgrasya gumikan kay ang traffic sign dili na makit-an o mabasa.

Ang buhatan sa Comelec nihatag og pagtugot sa taga CT-TODA sa pagtangtang sa mga campaign poster nga nakaali sa traffic signs.

Lakip nga nihatag og suporta niini ang kapolisan sa siyudad pinangulohan ni Police Lieutenant Colonel Myla Maramag. (BANAT NEWS)