Pagtukod sa bag-ong Municipal Jail sa Consolacion sugdan na

CEBU, Philippines — Hingpit na gayod nga sugdan ang pagpatukod sa bag-o nga Municipal Jail sa lungsod sa Consolacion human sa lima ka tuig nga pagkalangan niini.

Atol sa groundbreaking ceremony, si Mayor Teresa Nene Alegado miingon nga ang bag-ong bilanggoan sa lungsod ipahimutang sa 1.5 ka ektarya nga luna nga ilang gipalit sa kantidad og P6.5 milyon ug gidonar ngadto sa Bureau of Jail Management and Penology nga gigahinan og P184 milyones.

Ang pagtukod sa maong bag-ong bilangguan maoy tubag sa dugay na nga suliran sa paghuot sa mga piniriso.

Si Jail Chief Superintendent Efren Nemenio sa iyang pamahayag miingon nga nakasinati gayod og kalangan ang gahin gikan sa ulohan nilang buhatan nga milungtad gyod og lima ka tuig.

Dugang pa niya nga mokabat unta sa P300 milyones ang kantidad nga original nga gigahin sa proyekto apan P184 milyones lamang ang giaprobahan.

Si Karla Magsino nga nag representar sa 525 Life nga maoy contractor niini miingon nga ang bag-ong jail complex nga tukoron naglakip sa duha ka andana nga administration building ug tulo ka andana nga accommodation building alang sa mga PDL's ug ingon man kitchen area.

Dugang pa niya nga molungtad lang sulod sa 360 ka adlaw ang pagtrabaho base sa nahimutang sa ilang kontrata.

Si Mayor Alegado miingon nga gituyo niya sa maong lugar ipahimutang ang bag-ong municipal jail tungod kay tinguha usab niya nga ang PDL's makapahigayon sa pagpananom isip ilang kalingawan samtang anaa sila sulod sa maong pasilidad.

Ang karaan nga bilanggoan sa higayon nga mabakante na kini mahimo na kining kabahin sa ilang museum sa lungsod nga ilang ipasigarbo sa mobisita nga mga lokal ug langyaw nga mga turista. (BANAT NEWS)