Kuwang sa budget, rason sa kalangay sa trabaho sa Guba hospital

CEBU, Philippines — Kakuwang sa budget ug nausab ang billing process sa Department of Health mao ang gitumbok nga rason nga nalangay ang paghuman sa extension building sa Guba Community Hospital.

Kini ang gipasabot ni Architect Globen Catubigan kinsa representante sa Golden Compass Builders ug usa sa lima ka mga kontraktor sa proyekto sa Department of Health.

Matud ni Architect Catubigan nga mokabat ngadto sa P20 milyones ang kinatibuk-an nga pag-ayo sa ospital apan tungod kay daghan na sila og nahimong proyekto kauban ang DOH, gi-bid nila kini ngadto nalang sa P15 milyones.

Gilangkuban sa P15 milyones ang pagtrabaho sa walling, roofing, painting, ceiling alang sa maong edipisyo.

Kasamtangang anaa sa 28% ang nahimo sa maong kontraktor alang sa ospital sukad nga gisugdan kini niadtong Enero 2024.

Si Dr. Carol Cahigas kinsa mao ang pangu sa ospital miatubang sab sa konseho kagahapon ug gisaysay niya ang problema sa baha ug drainage, pagmolds sa mga bongbong ug ang wala matapos nga pagbutang og mga atop sa edipisyo.

Gibutyag sab ni Cahigas nga sa dihang nasinati nila ang maong problema, dali nila kini nga gireport sa DOH, sa Cebu City Disaster Risk Reduction Management ug sa Cebu City Medical Center aron nga maaksyunan kini.

Niadtong Septiyembre 26, 2024 unang midangop sa DOH si Cahigas ug gitubag sab ang iyang reklamo sa unang semana niadtong Oktubre apan kutob lang sa inspeksyon ang nahitabo.

Matud pa ni Cahigas nga wala gyud siya moundang sa pagdangop sa DOH ug bisan pa man karong buwana wala gihapoy aksyon sa maong problema.

Gisaysay niya nga nakabalda na gyud sa mga serbisyo ang maong problema gumikan kay matag karon ug unya og mag-uwan magsigi sila og kawos sa tubig uwan nga adunay lapok.

Samtang gipasalig ni Catubigan nga humanon nila ang maong proyekto karong Hulyo 2025. (BANAT NEWS)