Kumander sa NPA nisurender sa kapolisan sa Abellana Police Station

CEBU, Philippines — Nitahan sa iyang kaugalingon ang gikatahong kumander sa New People's Army (NPA) sa Abellana Police Station sa Cebu City Police Office(CCPO) niadtong Martes, Marso 25, 2025.

Ang nisurender mao si Misael Atadero Dela Cruz, 57-anyos, taga Sitio Kakha, Barangay Talalak, Lungsod sa Sta. Catalina, Probinsya sa Negros Oriental.

Gikataho nga si Dela Cruz kinsa nag-atubang mga dagkong kaso aduna kini pito ka alyas nga mao ang Jimlan, Layan, Ly, Totoy, Yanyan, Naldo ug Yaksel.

Ang pagsurender ni Del Cruz nahimo pinaagi sa tabang sa Regional Intelligence Unit-7 ug gikuyogan kini sa iyahang asawa.

Gi-served usab sa kapolisan ang mga warrant of arrest batok kang Dela Cruz.

Lakip sa kasong giatubang ni Dela Cruz mao ang tulo ka ihap sa kasong rebellion  ug tulo ka ihap sa kasong murder diin ang ang Regional Trial Court (RTC) Branch 63 ug 64 sa Bayawan City ug Guihulngan City parehong sa Negros Oriental ang niluwat og warrant of arrest batok kaniya sa maong mga kaso.

Si Dela Cruz nag-atubang usab og kasong kalapasan sa Akta Republika 9851 kun “Crimes Against International Law, Genocide and Other Crimes Against Humanity” ug duha ka ihap sa kasong frustrated murder diin ang RTC Branch 63 ug 64 ngadto sa maong mga siyudad ang niisyu og WOA batok sa suspetsado sa maong mga kalapasan.

Laing warrant of arrest nga giluwatan sa RTC Branch 38 sa Dumaguete City sa kasong kalapasan sa Akta Republika 10591, Akta Republika 7166 in relation to Comelec Resolution No. 10728.

Ang RTC Branch 64 sa Guihulngan City niluwat usab og WOA batok sa suspetsado sa kasong duha ka ihap nga robbery ug unom ka ihap sa kasong theft.

Ang supetsado nagkanayon nga tumong sa iyang pagsurender diha sa kapolisan Cebu City mao ang siguridad tungod kay mahadlok kini didto sa Negros mo surender.

Ug giingong alang usab kini sa kaluwasan sa iyahang pamilya ug gikapoy na usab siya og tago-tago.

So Dela Cruz gikonsidera kini nga most wanted person national level ug gani adunay reward money nga gipatong sa ulo niini. (BANAT NEWS)