Siyudad sa Mandaue nanawat na og aplikante sa scholarship

CEBU, Philippines — Nagsugod na ang kagamhanan sa siyudad sa Mandaue sa pagdawat og mga aplikante alang sa paghatag og scholarship sa mga tinun-an sa school year 2025-2026.                                                                                                                                   

Si Konsehal Malcolm Sanchez, chairperson sa committee on education sa konseho sa siyudad miingon nga ang matag aplikante kinahanglan gayod nga bag-o pa nga migradwar sa senior high school ug nagbaton kini og general average sa iyang grado nga 85 porsiyento.

Dugang pa niya nga ang mga sakop sa scholarship board wala pa makatino sa gidaghanon sa ilang dawaton nga mga scholars alang karong tuiga 2025.   

Sa ilang panagtagbo sa sunod semana ilang i-finalize ang kabahin sa gidaghanon sa dawaton nga scholars.

Si Konsehal Sanchez miingon nga ang kagamhanan sa Siyudad sa Mandaue ang naghatag og scholarship program alang niadtong mga less fortunate nga mga tinun-an. Sa mga pakisusi nga ilang himoon matag tinun-an kinahanglan dunay kapasidad nga naglakip sa academic record ug financial nga kahimtang.

Ang makapahimulos sa programa mao ang mga molopyo gyud sa siyudad sud sa tulo na ka tuig ug kini pamatud-an sa barangay kapitan.

Si Sanchez miingon nga ang kagamhanan sa dakbayan adunay P17, 000 nga gigahin sa matag tinun-an ug kini ilang gidugangan og P2,500 nga naghimo na nga P19,500 sa matag tinun-an. (BANAT NEWS)