Mayoralty candidate nireklamo batok sa mga sakop sa electoral board

CEBU, Philippines — Usa ka mayoralty candidate sa Lungsod sa Palompon, Leyte ang niduso og reklamo ngadto sa Comission on Election nga nag-awhag sa reversal sa giingong kadudahang appointment sa 43 ka miyembro sa electoral board sa lungsod.

Sa letter complaint ni Dr. Myra Georgina Arevalo ngadto kang Municipal Election Officer Elvisa Tiu penetsahan niadtong Marso 5, 2025 nialegar kini nga pipila kanila mga non-teaching o non-Department of Education (DepEd) staff.

Gawas niini, nialegar usab si Arevalo nga adunay mga DepEd teaching staff apan kasamtangan nga na-assign gawas sa munisipalidad ug ang uban giingong kabanay sa politiko sa barangay ug sa mga kandidato karon.

Ug ang Comelec giingong wala nagkonsulta sa school district heads sa Palompon sa pagpili sa mga miyembro sa electoral board.

Gikataho nga sa 135 ka miyembro sa electoral boards giingong lima ka non-teachers, 10 ka non-DepEd teachers ug 28 ka appointees ang  konektado pa sa barangay ug municipal officials ug kabanay sa mga kandidato sa 2025 elections.

Nihangyo usab si Arevalo sa Comelec alang sa listahan sa 3rd member sa electoral board.

Laing hangyo ni Arevalo mao nga tangtangon ang 30 ka miyembro sa electoral board nga iyang gihulagaway nga non-teaching o non-DepEd staff kinsa na-assign gawas sa munisipalidad ug related sa barangay ug municipality official ingon man sa mga kandidato.

Base sa Section 3 sa Akta Republika No. 10756 kun "An Act Rendering Election Service Non-Compulsory for Public School Teachers, Authorizing the Appointment of Other Qualified Citizens", ang position sa chairperson ug members sa electoral board iukopar lang og non-public school teachers kon adunay kakuwang sa public school teachers nga andam, available ug qualified nga mo serbisyo.

Samtang ang registered voter sa munisipalidad mahimong maka-perform og election service kon dili kini konektado sa bisan kinsa nga kandidato o political party.

Giingong dunay kapin sa 600 ka DepEd teaching staff ang na-assign sa Palompon diin daghan ang adunay kasinatian isip miyembro sa electoral board ug nag-serve sa nilabay’ng eleksiyon ug angayang i-prioritize nga itudlo isip kabahin sa election board.

Si Arevalo unang nisuwat sa Comele niadtong Pebrero 15, 2025 apan giingong wala kini nakadawat og tubag gikan kang Tiu.

Usa sab ka kopya sa suwat ang gipadala kang Comelec Chairperson Atty. George Erwin Garcia ug kang Atty. Remlane Tambuang, regional executive director sa Comelec Regional Office 8. BDB BANAT NEWS