Mga PDL sa Mandaue City Jail nakadawat og legal aid

CEBU, Philippines — Duha ka kahugpungan sa mga abogado sa Sugbo ang nakighiusa sa pagsaulog sa International Women's Month sa bulan sa Marso 2025.

Kini pinaagi sa pagpasiugda og kalihukan alang sa mga Person's Deprived of Liberty (PDL) nga kababayen-an sa Mandaue City Jail sa Barangay Looc, Siyudad sa Mandaue.

Ang Cebu Lady Lawyers Association Inc. (CELLA) ug ang Integrated Bar of the Philippines (IBP) Cebu Chapter ang nagpahigayon og PDL Data Management System ug PDL Paralegal Competency Training.

Si Atty Grace Hermosa Casano nga presidente ug executive director for Legal Aid ug IBP Cebu Chapter uban ni Atty. Regal Oliva maoy nagpasiugda sa maong kalihokan.

Nalakip na sa ilang katuyoan mao ang pagtabang sa mga PDL sa Female Dormitory nga ma-follow up ang ilang mga kaso tungod kay namatikdan nga adunay mga PDL nga milapas na sa gikatakdang tuig sa ilang pagkabilanggo.                                                                                                        

Si Atty Hermosa Casano miingon sulod sa duha na ka tuig ilang natabangan sa pagpagawas sa bilanggoan ang 1,856 ka mga PDL's ug ang mao nilang programa ang gihatagan usab og hugot pagsuporta sa Korte Suprema.

Ang lain nilang programa nga gipasiugdahan gawas sa legal support mao ang pagdasig usab sa mga PDL's nga makapadayon sa ilang pagtungha bisan anaa sila sa bilanggoan pinaagi sa pag-enroll sa Alternative Learning System (ALS) sa Department of Education (DepEd) nga ubos usab sa pag-abag sa mga opisyal sa bilangguan.

Nakapahimulos usab ang mga PDL og libreng eyeglasses ingon man gihatagan usab sila og food packs. (BANAT NEWS)