Palasyo: dili kidnapping

CEBU, Philippines — Dili matawag nga ang pag-aresto ug pagdala kang kanhi presidente Rodrigo Duterte ngadto sa The Netherlands “state kidnapping” nga maoy gipasangil sa iyang anak nga si Vice President Sara Duterte sumala pa sa Malacañang kagahapon, kay matud pa miagi kini og proseso ug gihimo kini base sa balibong warrant of arrest.

 “How could it be a kidnapping if there was a warrant of arrest? It was issued by an authority, by the court. When there is an issuance of any order from the court, we have to comply – especially with what happened to us – through Interpol,” pangutana pa ni Presidential Communications Office Undersecretary Claire Castro sa press briefing.

Si Duterte giaresto niadtong Martes sa pag-abot niya sa Ninoy Aquino International Airport Terminal 3 gikan sa Hong Kong. Si Castro, kinsa usa ka abogada miingon nga ang kidnapping nagpasabot nga pwersadong gisignit ang tawo.

“Let’s say a sheriff is serving warrant. We can’t just turn our back on him, or hurt him or punch him. That’s not acceptable,” matud pa niya nga may dalang palabtik sa kontrobersiyal nga pagsukmag sa bise presidente sa court sheriff niadtong 2011  sa dihang siya pay mayor sa Davao City.

Ang bise presidente nilarga na kagahapon padung sa Netherlands aron tabangan ang amahan. Matud pang Castro, ang Office of the President niaprubar sa travel authority sa bise presidente niadtong Martes sa gabii.

Niadtong Martes sa gabii, si Presidente Ferdinand Marcos Jr. miklaro nga ang pag-aresto kang Duterte dili politikanhong pagpanglutos o paglapas sa soberiniya sa Pilipinas, pagtuman lang kini sa kasabotan tali sa International Criminal Police Organization (Interpol) ug dili sa ICC.

 Niadtong tuig 2019, si Duterte mimando nga mogawas ang Pilipinas sa Rome Statute, kini ang kasabutan nga nag-establisar sa ICC.

Ang ICC mao ang dangpanan sa mga tawo nga giabuso sa kaugalingon nilang gobiyerno, kini kung ang hustisya sa ilang nasud naimpluwensiyahan na sa mga lider niini ug wala nay patas nga pagtagad sa ilang reklamo nga mapaabot.

Si Marcos midugang nga dili gikan niya ang kaso, kondili, nasang-at kini sa panahon nga si Duterte pa ang presidente.

Sa pikas bahin, ang Department of Justice miingon nga ang pag-aresto kang Duterte pinasubay tanan sa balaod ug proseso ug ubos sa lokal nga mga balaod sa Pilipinas, pwedeng i-surrender sa mga suspek sa mga kaso diha sa international court.

Ang warrant of arrest giisyu sa Pre-Trial Chamber of the ICC for the crime against humanity of murder under Article 7(1)(a), in relation to Article 25(3)(a), of the Rome Statute.

Sa pikas bahin, si  Sen. Ronald "Bato" dela Rosa kinsa kaniadto namahayag nga “shit happens” sa dihang dunay 3-anyos nga batang babayeng napagan sa police operation sa war on drugs, ning bag-ohay lang miingon nga bisan usa ka kinabuhi dako kaayong kawad-on para lang sa war on drugs.

Si Dela Rosa maoy kanhi PNP Chief sa dihang gihimo ang brutal nga war on drugs diin kaliboan ang napatay, gibanabana sa gobiyerno nga moabot og 6,000 ang napatay apan ang human rights groups miingon nga lapas kini 30,000.

Sa interbyu sa senador sa ANC’s Dateline Philippines, nagmagahi si Dela Rosa pagtubag dihang gipangutana kini nganong gilisud-lisod ang mga pamilya sa mga napatay sa war on drugs pagkuha og kopya sa mga police reports o  death certificates

“‘Wag na! That’s plain bullshit! That’s plain propaganda!” lanog nga tubag ni Dela Rosa dungan sa paghagit sa mga kritiko nga pakasohan siya tagsa-tagsa sa mga pamilya sa mga biktima imbes bansagan kining extrajudicial killings (EJKs).

“My God, I am a professional policeman. One death is too many. One death is too many para sa akin,” puno pa niya.

Base sa rekord, pipila ka bulan sukad sa paglingkod ni Dela Rosa isip PNP chief niadtong 2016 sobra 3,000 ang napatay hangtud Septiyembre.

Usa ang senador sa gipasakaan og kaso didto sa ICC. Si  kanhi senador Antonio Trillanes, usa sa mga nipetisyon didto sa ICC miingon nga posibleng ang sunod nga malutsan og arrest warrant mao si Dela Rosa.                              

Proteksyon sa Senado

Sa kalabot nga balita, si Dela Rosa nangayo og temporary protection sa Senado tungod sa posibilidad nga siya nay sunod dakpon.

Matud pa niya, andam siya moatubang sa legal proceedings apan malaumon siyang tugotan siya ni Senate President Francis Escudero  nga maprotektahan sa Senado.

“Hanggat kaya nga niya, hanggat kaya ng Senate president na kupkupin niya muna ko. Hindi niya muna ko i-surrender kung may warrant of arrest, kung na may session kami. I hope respetuhin din siya ng executive branch of government kasi mayroon naman 'yan ang ganoon protocol,” matud pang Dela Rosa sa phone interview sa mga reporters niadtong Miyerkules sa gabii.

Sa laing bahin, ang Korte Suprema kagabii adlaw nga Huwebes, Marso 13, mimando sa mga gipangalanang mga opisyales sa gisang-at nga petisyon sa kampo ni Duterte nga tubagon sud sa 24-oras ug iesplikar nganong dili pwedeng tugotan ang pag-isyu og writ of habeas corpus aron kini ibalik dinhi sa nasud.

Giusa na sab sa Korte Suprema ang mga petisyon nga gisang-at sa mga anal sa kanhi pangulo nga silang Sebastian "Baste," Veronica "Kitty" ug Rep. Paulo “Pulong” Duterte nga parehong mihulagway nga ilegal ug nakalapas sa soberiniya sa Pilipinas ang pagdakop sa ilang amahan ug nihangyo sa korte pagpagawas og habeas corpus, certiorari, and prohibition, with a prayer for a temporary restraining order (TRO).—Gikan sa Philstar.com/IBM BANAT NEWS