Driver sa nagpatay sa magtiayon nadakpan

CEBU, Philippines — Nadakpan sa kapulisan sa Criminal Investigation and Detection Group-7 ang usa sa mga suspetsado sa pagpusil patay sa kapitan sa Barangay Manguiao ug sa asawa niini samtang ang duha sakay og motorsiklo sa miaging tuig.

Ang suspek nga si Robert Ubalde alyas Obet o Kapoy, 26, nadakpan diha sa Barangay Subangdaku, Dakbayan sa Mandaue pasado alas 12 sa udto niadtong Lunes, Pebrero 17, 2025.

Si Ubalde kinsa residente sa Sitio Bohol-Bohol, Barangay Looc, Mandaue City, matud pa ni Police Lieutenant Colonel Regino Maramag, Chief sa Intelligence Section sa CIDG-7 maoy driver sa motorsiklong gigamit sa gunman sa pagpusil patay sa magtiayon nga Mario Delfin Tundag ug Edna Awit Tundag.

Kahinumduman nga ang magtiayon sakay sa ilang motorsiklo gikan sa Balamban ug padung na mouli sa dihang gisundan sila mga lalaking nagsakay sab og motorsiklo nga iya ni Ubalde.

Ug didto gipamusil ang magtiayon ug nahagba sa National Highway sa Barangay Poblacion, Lungsod sa Asturias atubangan sa usa ka pangpublikong eskuylahan.

Nailhan si Ubalde pinaagi sa CCTV footage sa munisipyo nga nakuha sa CIDG Provincial Field Unit-7.

Gipa-identify sa mga saksi ang mga nakit-an sa CCTV footage ug ilang gikompirmar nga nailhan nila ang suspetsado hinungdan nga gipasakaan nila kini og kasong multiple murder apil na ang gunman.

"Sa resolution ng fiscal sa Toledo, nilabas nila ang warrant so ito yung ginamit natin sa pag-aresto natin sa suspek(Robert Ubalde), , sigon ni Maramag.

Matud ni Maramag sa imbestigasyon nga gihimo sa CIDG personal grudge ang motibo sa maong pagpamusil ug nasuta nila nga dunay kontra ang kapitan.

Base sa gitug-an ni Ubalde kaila niya ang gunman o ang tawo nga nagpusil sa magtiayon sanglit mao kini ang ni-kontak niya.

Ang gunman una nang nadakpan niadtong Septiyembre 17, 2024 atol sa buybust operation ug karon naa na sulod sa Mandaue City Jail Male Dormitory.

"Sa ngayon on going pa investigation namin sa mga cohorts nitong dalawa... ‘yung gun man is merong experience sa gun-for-hire," ni Maramag pa.

Samtang sa Ubalde misaysay nga gi-pick up siya sa gunman gikan sa Mandaue City padung sa Asturias gamit ang iyahang personal nga motor nga maoy say gisakyan nila sa paghimo sa krimen.

Gabii anang adlawa sila naabot sa Lungsod sa Asturias hinungdan nga namahuway sa sila ug gi-contact nalang siya kung asa kuhaon ang armas.

"Naay nitawag nako kalit nga ipakuha didto ang firearms sa shooting range sa Asturias.” Human niini, nilargo na sila og pwesto ug nagbantay.

Nianang pagka Marso 13, 2024 niagi sa ilang gipwestohan ang biktima apan wala nila nahimo ang krimen kay naaberya ang motorsiklo ni Ubalde. Ilaha kining gisuwayan og sunod sa usa ka dakong tindahan apan wala didto ang kapitan mao nga niadto sila sa Barangay Tubod.

Maong pagka Marso 14, 2023 didto na nila gihimo ang pagpusil apan napagan ang asawa niini.

Kalibre .45 nga armas ang matud pa gigamit sa pagpusil sa duha bugti sa suhol nga P40,000 nga ilahang gitungaan.

Human sa pagpamusil nisibat sila padulong sa Balamban apan sa Barangay Uwak ra sila kutob kay naratol na matud pa si Ubalde.

"Mao ‘to gilabay iyahang jacket, ako nag-ilis nalang pud ko, gibilin akong motor, ako ‘to gilabay na tanang detalye nga kanang nagamit sa krimen," tug-an pa ni Ubalde.

Nisakay dayon sila og tricycle padung sa Balamban, pag-abot sa Balamban nisakay dayon sila og bus padung sa Naga ug gikan sa Naga niadto sila  sa Barangay Pardo ug didto na sila nisakay og taxi padung sa Mandaue City.

Wala na siya nidetalye pa kun asa nga mga lugar siya niadto ug nangayo kini og pasaylo sa pamilya sa mga biktima.

"Mangayo kog pasaylo sa pamilya sa biktima nga nadala ra gyud ko sa triggerman mao ra, mangayo ko’g pasaylo," ni Ubalde pa.

Nisulod matud pa siya sa maong ilegal nga binuhatan kay apiki siya sa kwarta. IBM  BANAT NEWS