Manag-uyab, anak nadakpan sa drugbust

CEBU, Philippines — Napriso ang usa ka amahan, anak niini ug ang usa ka kanhi tigbalita nga giingong uyab sa nadakpang amahan atol sa buy-bust operation sa Mambaling Police Station 11 Cebu City Police Office sa 429-P Fatima St, Brgy. Duljo Fatima, siyudad sa Sugbo kagahapon sa kadlawon, Martes, Pebrero 18, 2025.

Ang mga nadakpan mao sila si alyas Thom, 51; alyas Ann, 48, ug si alyas Henry, nga pulos nagpuyo sa maong barangay.

 Nasakmit sa mga operatiba sa Mambaling Police Station 11 ang 252 grams nga shabu nga nagkantidad og P1.7 million.

Giingong gihimo nga negosyo sa pamilya ang pagpamaligya og illegal nga drugas. Ang amahan matud pa napriso na kaniadto tungod gihapon sa   illegal drugas, ang anak nagbisyo ug namaligya niini samtang ang kanhi sakop sa media giingong uyab sa amahan.

Sa pikas bahin, gipasakaan og kasong kalapasan sa Section 5 ug 11, Article II sa Republic Act 9165 ang usa ka high value individual nga nadakpan sa Provincial Intelligence Unit-Police Drug Enforcement Unit sa Bohol Police Provincial Office(BPPO) sa ilang buy-bust operation sa Purok 3, Barangay Upper De La paz, Lungsod sa Cortes, Probinsya bsa Bohol sa niaging adlaw.

Ang nadakpan mao si Judy Tongco, 30 anyos, nagpuyo sa Purok-7, Sitio Tuog, Danhaw, Lungsod sa Clarin sa maong Probinsya.

Nasakmit sa mga operatiba gikan sa suspetsado ang 1,000 grams sa gituohang shabu nga nagkantidad og P6.8 million.

Giingon nga usa ka inmate sa Abuyog Penal Colony sa Leyte ang kontak sa suspek nga tinubdan sa ilegal nga drugas niini.

Sa laing bahin, nagmalampuson ang Police Regional Office(PRO)-7 sa ilang police operations gikan sa February 9 hantod sa 15, 2025 sa Central Visayas.

Sa maong semana niabot sa 901 individuals ang nadakpan ug anaa sa P26.3 million nga balor sa drugas ang nasakmit ug 117 ka unregistered firearms ang nakompiskar ug gi-surrender.

Samtang 324 ang nasikop sa illegal gambling ug kapin sa P31,000 nga kwarta nag nasakmit.

Ang PRO-7 na-implementar sab sa mga warrant pf arrest diin 29 ka most wanted persons ang sikop ug 227 ka other wanted persons ang nadakpan.  IBM BANAT NEWS