Babysitter nga giingong nimolestiya og 3-anyos nga bata gidakop

CEBU, Philippines — Balhog sa prisuhan ang usa ka 27-anyos nga tomboy human matod pa nang molestiya og 3-anyos nga batang babaye sa Barangay Buhisan, siyudad sa Sugbo.

Ang dinakpan mao si alyas Ebyang, residente ra sab sa naasoy nga Barangay.

Sa impormasyon sa Labangon Police Station 10 Cebu City Police Office(CCPO) nga niadtong alas 12:20 sa tungang gabii sa adlaw'ng Domingo ang amahan sa biktima nga si alyas El, 30 anyos, gitabangan sa BPSO personnel sa Barangay Buhisan human kini mi-report sa giingong law-ay nga gibuhat sa dinakpan ngadto sa iyang anak.

Matud pa sa pag-uli sa amahan sa ilang balay alas 7 sa gabii nianang pagka Sabado, Pebrero 15, 2025 nakabantay kini nga dili mahimutang ang iyahang anak.

Gipangutana sa amahan ang iyang anak nga babaye kun unsay nahitabo ug didto kini mitug-an nga gipasulod matod pa sa suspect ang tudlo niini sa kinatawo sa biktima.

Nagpatabang ang amahan sa BPSO hinungdan gidakop ang suspect ug gidala sa Labangon Police Station 10.

Gipaabot nga pasakaan og tukmang kaso ang suspetsado. MEL  BANAT NEWS