Laing eo giluwatan pagpahunong sa pagkubkub sa 2 ka minahan

CEBU, Philippines — Si Gobernador Gwendolyn Garcia miluwat og laing mga executive orders nga temporaryong nagpahunong sa tanang "earth-moving" nga operasyon sa duha ka kompaniya sa mina sa habagatang Sugbo.

Ang Apo Land and Quarry Corporation (ALQC) ug ang Solid Earth Development Corporation (SEDC) parehong gimandoan nga ihunong usa ang tanang "earth-moving" nga operasyon sulod sa 30 ka adlaw sugod Pebrero 18, 2025.

Kini human nga wala pa matapos ang gihimong environmental audit, comprehensive risk area assessment ug pagsuta sa carrying capacity sa maong mga kompaniya sulod sa Mineral Production Sharing Agreement (MPSA) area niini o ang lugar kon asa gitugotan pagkubkob ang maong kompaniya.

Ang MPSA usa ka kasabotan nga naghatag og pagtugot sa usa ka kompaniya nga mokubkob sa usa ka lugar sulod sa gilatid nga panahon.

Niadtong Enero 10 karong tuiga, si Garcia miluwat og managlahing EO pagmando nga temporaryong ihunong ang pagkubkob o "earth-moving activities" sa maong mga kompaniya alang sa nahisgotang assessment.

Apan ang maong kamandoan kutob lang Pebrero 10, apan wala pa nahuman ang gihimong environmental assessment.

Hinungdan nga mimando si Garcia balik pinaagi sa pagluwat og laing mga EO nga ihunong usa ang pagkubkob, o mohimo og bisa'g unsa nga kalihokan nga makonsiderar nga "earth-moving activities".

Ang ALQC usa ka kompaniya nga mosuplay og limestone, clay ug greywacke nga mga raw materials sa paghimo og semento samtang ang SEDC usa minahan nga nagsuplay og quarry materials sa mga naghimo og semento.

Si Gobernador Gwendolyn Garcia unang nagkanayon nga buot niya masuta ang kalapad na sa operasyon sa mga dagkong kompaniya sa minahan nga adunay operasyon sa mga lungsod sa Probinsya sa Sugbo, aron masayran kun nagsunod pa ba kini sa gilatid sa balaod hilabina sa environmental laws. Kini aron dili masubli ang nahitabong landslide sa dakbayan sa Naga niadtong tuig 2018. MEL BANAT NEWS