Track oval sa CCSC ipaubos pa sa evaluation

CEBU, Philippines — Giklaro ni Cebu City Mayor Raymond Alvin Garcia nga kinahanglan pa nga magpahigayon og evaluation ang Department of Engineering and Public Works una bayaran ang contractor sa track oval sa Cebu City Sports Center.

Kini human nipadayag ang SBD Builders nga langay ang pagluwat sa Certificate of Completion sa gitrabaho nga track oval nga maoy basehan aron makadawat sa bayad gikan sa kagamhanan sa Dakbayan sa Sugbo.

Gipasabot ni Garcia nga ang tanang mga proyekto ubos sa kagamhanan kinahanglan nga dawaton una sa DEPW una pa kini mohatag og bayad.

Mamahimo kining maong inspeksiyon ug evaluation sa DEPW apan mas kampante kini nga mokuha og mas lehitimo nga opinyon gikan sa mga eksperto.

Sayo pa, gipaubos sa repair ang track oval sulod human nasuta nga daghang guba ug walay naangay nga mga rubber sa track oval human gipahigayon ang mga dagkong kalihokan niadtong niaging tuig.

Gibutyag ni Garcia nga nakigtagbo usab siya kang Engineer Lowell Corminal, pangulo sa DEPW ug natuki nila niadtong niaging semana ang pagkuha og laing inspector alang sa track oval.

Si Garcia naghuwat sa proposal gikan sa gikuha nga inspector ug ang kantidad sa pangayuon niining bayad aron masugdan na ang inspection ug ma-evaluate ang kahimtang sa track oval human sa pag-repair niini.

Ug kong masugdan na ang evaluation huwaton ni Garcia ang report ug tan-awon og nihaom ba sa terms of preference kong angayan ba nga bayaran ang contractor sa track oval.  BDB BANAT NEWS