Kapitolyo mohangyo og exemption sa Comelec

CEBU, Philippines — Plano sa Kapitolyo nga mohangyo ngadto sa Commission on Elections (Comelec) nga i-exempt sa ahensiya ang social services nga mga programa sa Probinsiya sa Sugbo sa mga gidili karong panahon sa eleksiyon.

Ang hunta probinsiyal nihatag og pagtugot kang Gobernador Gwendolyn Garcia nga mohangyo sa Comelec Law Department nga dili maapil sa mga gidili nga himuon panahon sa piniliay subay sa Comelec Resolution No. 11060 kun " Rules and Regulation on the Prohibition against the Release, Disbursement or Expenditure of Public Funds for Social Services and Housing-Related Projects and Issuance of Treasury Warrants and Similar Devices",

Ang pagdili sa pag-apod-apod og pundo sa gobiyerno subay sa maong resolusyon magsugod gikan Marso 28 hangtud Mayo sa 11, 2025 o 45 ka adlaw sa dili pa ang adlaw  sa eleksiyon.

Ang Probinsiya sa Sugbo padayon ang pagpahigayon sa social services niini.

Base sa resolusyon nga gipangamahan ni Bokal Red Duterte sa ika-limang distrito gisaysay nga aron makapadayon sa pagpatuman og serbisyo ang Probinsiya sa Sugbo ngadto sa mga konstituwente niini kinahanglang adunay pagtugot ang hunta probinsiyal sa gobernador nga mohangyo ngadto sa Comelec alang sa exemption.

Sayo pa, ang Comelec nihatag og exemption sa 4Ps, AKAP, ug AICS ug uban pang  social welfare programs atol sa election apan kinahanglang walay politiko nga moapil sa pag-apod-apod sa maong mga ayuda ngadto sa beneficiaries. BDB BANAT NEWS