Grupong “Kontra Tikas” gilusad aron mobantay sa mga botante

CEBU, Philippines — Gilusad kagahapon sa mga representante sa nagkadaiyang sector ang grupo nga “Kontra Tikas” nga maoy mobantay sa mga botante atol sa eleksyon karong buwan sa Mayo.

Kini gilangkuban sa mga volunteers gikan sa religious group, academe, health ug uban pa, nga nagkatapok sulod sa Filipiniana Hall sa Archbishop Palace aron sa paglusad sa Kontra Tikas diin ang pinasidunggan nga dinapit mao ang obispo sa Diocese of San Carlos Most. Rev. Gerardo Alminaza, kinsa mao ang Resource Speaker.

Boluntaryo nga mohatag sa ilang serbisyo ang mga nanambong nga volunteers ug sila ang mo edukar sa mga tawo sa mga politiko nga angay botaran.

Sumala pa ni Rev. Raymundo Gelloagan, ang tigpamaba sa “Kontra Tikas” nga atol sa Election mosalmot sila isip watchdog o magbantay ug pagdokumento kon walay kagubot ug walay mga tikas.

Mopahigayon usab sila og Voter's Education diin moduol sila sa mga sitio level aron sa pagpakita kanila kinsa nga mga gustong magpapili ang angay nga botoran ug ang tinguha nga wad-on gyud ang political dynasty.

Ang grupo dili lang kini alang sa mga sakop sa Roman Catholic apan apil na ang nagkadaiyang relihiyon tungod kay sumala pa ni Gelloagan kinahanglan gayud ang paghiusa ug pagtinabangay sa tanan.

Unang gilusad ang grupong Kontra Tikas niadtong nakalabay nga election diin aduna usab silay napadangat nga mga taho ngadto sa ulohan nga buhatan sa Commission on Election.

Gipasigarbo sa grupo nga bisan og wala silay dagkong kwarta apan ang ilang pag boluntaryo maoy bugtong nilang mahatag alang sa kalamposan sa eleksyon. MEL BANAT NEWS