Lalake nanglungkab og water vending machine nadakpan

CEBU, Philippines — Imbes mopalit og bugas sa prisuhan ang deretso sa usa ka 54-anyos nga lalake human nanglungkab og water vending machine ug gikawat ang halin diha sa Sikatuna Street, Barangay Day-as, siyudad sa Sugbo, pasado alas 2 sa kadlawon kagahapon, Lunes, Pebrero 17, 2025.

Ang dinakpan mao si alyas Virgilio, 54 anyos, usa ka ex-convict ug nagpuyo sa sitio Bato, Barangay Ermita ning siyudad.

Nakuha sa CCTV footage ang paglungkab ug pagkawat sa suspetsado sa halin sa water vending machine nga niabot og dul-an sa P10,000 ug gisulod og bag.

Gumikan kay naklaro man ang nawong sa suspetsado dali kining natultolan ilabi na nga napriso na sab kini kaniadto tungod sa kasong murder diin ilang silingan ang iyang napatay.

Giadto sa sitio Bato, Barangay Ermita ang suspetsado ug nadakpan dayon gidala sa Parian Police Station 1 Cebu City Police Office(CCPO) ug nabalhog sa prisuhan.

Ang suspetsado sa iyang bahin mibutyag nga gumikan kay apiki sa kwarta maong nabuhat niya ang paglungkab ug pagkawat sa water vending machine.

Ipalit matod pa niya ang gikawat nga kwarta og bugas alang sa iyahang pamilya, ang suspect dunay unom kabuok anak.

Apan giangkon sa suspetsado nga sa miaging semana nakagamit siya og illegal nga drugas.

Kasong pagpangawat ang atubangon sa suspetsado. (BANAT NEWS)