Kinasang-an nakadawat og mini dump truck

CEBU, Philippines — Nakadawat og bag-ong mini dump truck ang Barangay Kinasang-an gikan sa kagamhanan sa Dakbayan sa Sugbo aron mapausbaw sa maong lugar ang ilang pagkolekta sa basura ug sanitation.  Ang pag-turnover sa sakyanan gipahigayon human sa flag-raising ceremony kagahapon, Pebrero 17, 2025 diin gipangulohan kini ni Cebu City Mayor Raymond Alvin Garcia uban ang mga konsehal nga sila si Francis Esparis, Joel Garganera, Edgardo "Jaypee” Labella II ug Jerry Guardo.

Si Barangay Captain Susan Enriquez uban sa ubang opisyales sa barangay nipadayag sa ilang pasalamat.  Base sa taho sa Public Information Office sa syudad, si Enriquez nagkanayon nga bisan og aduna na sila’y dump truck nga gigamit alang sa pagkuha sa basura kinahanglan gihapon nila og dugang dump truck aron mas mapalambo pa ang ilang pagserbisyo.

Si Enriquez nagpaambit usab nga ang hangyo alang sa mini dump truck gihimo pinaagi sa Cebu City Youth Development Commission (CCYDC).

Subay niini, gipasiugda ni Garcia ang padayon nga tinguha sa siyudad sa pagpauswag sa mga serbisyo sa pagdumala sa basura alang sa usa ka mas limpiyo ug mas himsog nga komunidad. (BANAT NEWS)