Labella gitahasan sa paghipos sa spaghetti wires sa Cebu City

CEBU, Philippines — Gitahasan ni Cebu City Mayor Raymond Alvin Garcia si Konsehal Jaypee Labella nga maoy mangulo sa pagpanglimpyo ug paghipos sa mga spaghetti wire sa Dakbayan sa Sugbo.

Ang maong tahas una kining gihuptan ni Konsehal Jerry Guardo kinsa maoy chairman sa committee on infrastructure.

Matud ni Garcia nga iyahang gipasa ang maong tahas ngadto kang Labella tungod kay kasamtangang gitrabaho karon ni Guardo ang pag-aspalto sa mga dalan sa siyudad.

Gibutyag ni Garcia nga gi-pressure niya si Guardo nga papaspasan ang paglihok sa pag-aspalto.  Ug dako usab ang pagsalig ni Garcia nga maatiman ni Labella ang paglimpiyo sa mga spaghetti wire tungod kay nakita niya nga abtik usab kini kong mahatagan og trabahuon.

Sa iyang bahin, si Labella nagkanayon nga human nihatag og “go signal” si Garcia nasugdan na dayon niya ang pagpalimpiyo ug nagsugod sila diha sa Barangay Mabolo ug Imus Road.

Nakita diha sa maong mga lugar nga daghang mga wire ang angay hiposon.

Gitabangan usab si Labella sa unom ka hugpong lakip na ang mga trabahante sa Telco ug CITOM.

Matud ni Labella nga isunod usab nila ang mga barangay nga mo-request sa iyang buhatan nga palimpiyohan ang mga wire.

Nangayo usab siya og pakitabang sa mga barangay kapitan nga maoy mopahigayon og mga inspeksiyon sa mga lugar sa ilang barangay aron mahapsay na ang mga poste niini.

Gibutyag ni Labella nga adunay pribado nga kompaniya nga motabang nila aron maoy mohipos sa mga wire.

Si Labella naglaom nga makahuman sila og pagpanghipos sa mga wire sa matag barangay sulod sa tulo ka semana. (BANAT NEWS)