Motor vs wing van, usa patay duha angol

CEBU, Philippines — Usa patay samtang duha ang naangol sa nahitabong panagbangga sa motorsiklo ug wing van truck sa National Road, Barangay Catarman, Lungsod sa Liloan, kagahapon sa alas 2 sa kadlawon, Lunes, Pebrero 17, 2025.

Ang motorsiklo gimaneho ni Christine Abarollo Tindoy, 29, taga Soong 1, Mactan, Dakbayan sa Lapu-Lapu samtang angkas niya sila si Farah May Alvaro Bataluna, 29, nagpuyo sa Sabang, Danao City ug usa ka 10-anyos nga batang babaye.

Samtang ang wing van truck gimameho ni Randy Mangibat Baliquid, 42 , taga Tay-ac, Rosario, La Union.  Sa imbestigasyon sa Liloan Municipal Police Station ang motorsiklo ug wing van truck nagdagan sa managlahi nga direksyon. Ang motorsiklo pa southbound samtang ang wing van truck pa northbound.

Apan giingong kalit nga nawagtangan og kontrol ang motorsiklo ug nibangga sa kasugat nga wing van truck.

Tungod sa hitabo, ang driver sa motorsiklo nalabay sa karsada ug dali kining gidala sa Eversly Child Sanitarium and General Hospital apan gideklarar kining dead-on-arrival.

Samtang ang duha ka mga nangaangol naa karon sa Mendero Medical Hospital nagpaalim. (BANAT NEWS)