Menor gipusil patay  

CEBU, Philippines — Patay diha-diha ang usa ka 17-anyos nga nanglaba dihang kini gipusil sa wala pa mailhing mamumuno diha sa sitio Didos, Barangay Linao, Syudad sa Talisay niadtong Domingo sa hapon.

Sa inisyal nga pakisusi sa kapolisan, ang biktima uban sa iyang kapuyo nga 16 anyos nanglaba sa maong dapit.

Apan kalit lang nga dunay nibutho nga wala mailhing  lalaki  ug diretso kining gipusil sa makadaghan nga higayon sa nagkadaiyang parte sa iyang lawas.

Base sa impormasyon sa kapolisan bahin sa biktima nalambigit kini sa pipila ka mga hitabo nga kawat sa ilang barangay ug silingan nga barangay.

Gani aduna sab kini giatubang nga kasong pagpanulis apan wala pa mogawas ang warrant of arrest. Ang kapolisan nagtuo nga may kalabutan aning iyang mga pagpanulis ug pagpangawat ang motibo sa pagpatay kaniya.

Apan wala sila nisira sa uban pa nga posibilidad sa motibo sa krimen ug padayon nga gisubay ang kaso sa tinguha nga mailhan ang mamumuno.

Sa pikas bahin, nalandig sa tambalanan ang usa ka lalake human kini gitalikod pagpusil samtang nagduwa og computer sa kompyuteran sa Block 7, Barangay Sawang Calero, Dakbayan sa Sugbo, Domingo sa gabii, Pebrero 16, 2025.

Ang biktima mao si Ronald Opalla Sabado, residente sa naasoy nga dapit.

Sa imbestigasyon sa Sawang Calero Police Station 6 Cebu City Police Office (CCPO) nagduwa og computer ang biktima dihang niabot ang duha ka mga lalake nga nagsul-ob og jacket nga naay hood ug sa wala'y igong rason gipusil ang biktima kaduha ka higayon sa likod.

Dali dayung misibat ang mga mamumuno samtang gidala dayon sa tambalanan ang biktima.  Nakuha sa crime scene ang duha ka basiyo sa wala pa matino nga kalibre sa armas.

Padayon sab ang imbestigasyon sa kapulisan labot sa maong pagpamusil. (BANAT NEWS)