Mama nagpa-liveshow sa anak

CEBU, Philippines — Usa ka joint entrapment operation nga gipangulohan sa Women and Children Protection Center-Visayas Field Unit ang gipahigayon nga miresulta sa pagkasikop sa usa ka inahan nga giingong miunay pagbugaw sa iyang mga anak sa human trafficking niadtong Pebrero 13, 2025 sa Isla sa Olango, Dakbayan sa Lapu-Lapu.

Ang imbestigasyon gasugod niadtong Hulyo 2023 sa dihang ang undercover officer nakadiskobre nga ang 33-anyos nga inahan nagtanyag og mga law-ay nga serbisyo gamit ang mga anak niini pinaagi sa online platforms.

Unang na-rescue ang iyang 15 anyos nga anak.

Atol sa operasyon, usa ka cellular phone ang nakompiskar gikan sa suspetsado ug sa samang adlaw ang Warrant to Search, Seize and Examine Computer Data(WSSECD) gi-implementar sa Sitio Poo, Barangay San Vicente, Olango Island, Lapu-Lapu nga miresulta sa pag-rescue sa laing 13-anyos nga menor de edad nga biktima ug pagkompiskar sa laing cellular phone.

Giingong ang customer sa suspek mga Pilipino ra. Ang mga bata kinahanglang mopakita sa ilang sensitibong parte sa lawas bugti sa P2,000 nga bayad kada pakita.

Nasayran nga ang suspetsado nagtrabaho sa usa ka bakery apan nisulod gihapon kini og ilegal kay matud pa gamay ang sweldo.

"Base sa ilahang mga alibi aside from gamay nga kita wala man sad gyuy mawala sa kuno igo ra kunong ipakita, dili man magunitan kuno, ang ilaha picture lang," sigon ni Police Lt. Col. Christian Torres, tigpamaba sa Lapu-Lapu City Police Office.

Ang duha ka bata naa na sa kustodiya sa Center for Women and Children, DSWD FO7 alang sa gikinahanglang medical ug psychological assessment.

Ang suspek kustodiya sa Police Station 1, Lapu-Lapu City Police Office ug gipasakaan og kasong kalapasan sa Sec. 4(a) sa Republic Act No. 11862 kun Expanded Anti-Trafficking in Persons Act of 2022

“This case highlights the importance of online surveillance and undercover work in protecting vulnerable individuals and we remain committed to dismantling human trafficking operations at every level," sigon ni PRO-7 Regional Directot Brigadier General Redrico Maranan.

Gidayeg sab niini ang unit nga nangulo sa operasyon uban ang Police Station 1, Lapu-Lapu City Pilice Office, Women and Children Protection Desk sa LCPO, Office of the City Prosecutor ug personnel sa DSWD FO7 sa malampuson nga pagpatuman sa balaod. (BANAT NEWS)