P30 milyones nga proyekto sa Lusaran River giaprobahan

CEBU, Philippines — Dili mominos P30 milyones nga kantidad sa Flood Control Systems - Slope Protection para sa Lusaran River ang giaprobahan sa konseho aron malikayan ang pagbaha duol sa pampublikong tunghaan.

Kini nga sugyot giaprobahan sa konseho atol sa pinakaulahing regular session niadtong Miyerkules.

Sa pakighinabi sa The Freeman kagahapon (Domingo), si Konsehal Jerry Guardo, Chairman sa Committee on Infrastructure, nagkanayon nga ang sapa sa maong dapit mao ang tubig nga nidagayday gikan sa kabukiran.

Dugang pa niya nga kini nga suba nahimutang tupad sa Lusaran Elementary School, diin naghatag og peligro sa pagbaha kung adunay pagbunok sa ulan.

Matud ni Guardo, ang suba gikonsiderar nga mabaw, apan matag higayon nga mobundak ang kusog nga uwan, motaas ang tubig. Tungod sa kakuwang sa proteksyon sa kilid niini, ang tubig midagayday paingon sa kilid sa eskwelahan.

“Nya ang mga bata naka experience na sila og knee-deep nga baha ba niya high-risk na kaayo ang mga bata, delikado na kaayo kay duol raman sa skwelahan, mao na iyang gikinahanglan ning i-protect nga portion,” matud ni Guardo.

Ang disenyo sa slope protection himuon pinaagi sa mga sheet pile, nga sagad gigamit sa pagpugong sa baha. Gihisgotan usab niya nga niabot og P30 milyones ang budgetary allocation sanglit naglangkob kini sa taas nga bahin sa civil works.

Gipasalig ni Guardo nga sa higayon nga matukod na ang slope protection, dili kini hinungdan nga mukusog ang flow sa tubig.

Kini nga proyekto, matud ni Guardo, apil na sa Flood Control Projects nga gipundohan sa dakbayan sa Sugbo, og nalakip sa Local Development Fund (LDF), nga mokabat sa P800 milyones.

Ang mga proyekto sa pagpugong sa baha sa dakbayan sa Sugbo usa sa mga prayoridad nga programa sa gobyerno.

Kaniadto, human sa pagkunhod sa budget, si Guardo niingon usab nga ilang gikonsiderar ang Public-Private Partnership (PPP) alang sa pagtukod og labing menos upat ka dam sa dakbayan sa Sugbo isip kabahin sa anti-flood measures.

Dugang pa niya nga atol sa ilang senimanang tigom sa Task Force Gubat sa Baha, ilang giila ang upat ka mga lugar nga mahimo nilang tukoran og mga mini dam. Iyang gitumbok nga subay usab kini sa rekomendasyon sa ilang consultant nga si Dr. Danny Jacque. (BANAT NEWS)