Pagmugna og programa pagsulbad sa suliran sa mental health giawhag

CEBU, Philippines — Gihangyo sa konseho sa siyudad sa Sugbo ang opisina ni Cebu City mayor Raymond Alvin Garcia nga mag establisar ug programa nga makasulbad sa problema sa mental health.

Ang maong hangyo naggumikan sa lain laing resolusyon nga gisang-at ni Councilor Rey Gealon atol sa ilang regular session nga naaprobahan sa konseho.

Nahisgutan sa resolusyon ang suway nga paghikog diha sa usa ka Inn, sa Salinas Drive, Brgy. Lahug, Cebu City ug laing insidente sa pagsuway og hikog diha sa Mambaling underpass sa brgy Basak San Nicolas siyudad sa Sugbo.

Gumikan niini gihimug-atan sa konseho ang importansya sa pagmugna og comprehensive mental health crisis response program dinhi sa dakbayan.

Lakip sa sugyot mao ang paghatag og dinalian nga psychological first aid sa mga tawo nga nakasinate og problema.

Hinoon si konsehal Joel Garganera atol sa diskusyon mitug-an nga adunay mga existing measures ang gipatuman sa siyudad aron suportahan ang mental health apan angayan gihapon kini nga palig-onon.

"We really need to be more extensive in our approach to these mental health cases," suma pa ni Garganera.

Sa maong sesyon giaprobahan sa konseho ang resolusyon nga naghangyo sa mga barangay officials, pinaagi sa Association of Barangay Councils, nga ipahibawo ang mga serbisyo kabahin sa pagsulbad sa mental health issues and concerns sulod sa ilang barangay.

Gihangyo usab ang City Health Department nga mopahigayon og information, education, and communication campaign sa mga gikinahanglan aron matubag ang maong problema. (BANAT NEWS)