TWG umolon alang sa pagpadayon sa Metro Cebu Expressway

CEBU, Philippines — Ang Probinsya sa Sugbo moumol og technical working group (TWG) alang sa hapsay nga koordinasyon sa mga ahensya ug kompaniya nga apil sa pagpatuman sa Metro Cebu Expressway (MCE) nga proyekto.

Si Gobernador Gwendolyn Garcia gikatakda nga moluwat og executive order alang sa paghimo sa maong TWG kon diin ang tahas mao ang pagsiguro nga paspas ug walay kakulian ang pagpatuman sa 73.7-kilometro nga expressway nga modugtong sa syudad sa Naga padulong sa dakbayan sa Danao pinaagi sa bukirang dapit sa Sugbo.

Sa nasayran ang Kapitolyo nakig-alayon sa Spanish company nga Acciona ug sa Japanese Taisei Corp. aron tun-an ang financial viability sa maong proyekto.

Ang tinguha usab sa maong partnership dili lang sa pagpapaspas sa trabaho lakip na sab ang ubang hagit sa pagtrabaho sa maong proyekto sama sa environmental concerns ug safety issue.

Ang mga local government units (LGUs) kansang mga lugar maigo sa maong proyekto ang gipaabot usab nga motabang alang sa paspas nga pagpahuman sa maong proyekto.

Ang Kapitolyo bag-o pa mitake over sa pagpatrabaho sa MCE gikan sa DPWH.

Kun kini mapadayon usa ka joint venture agreement tali sa Kapitolyo ug Acciona Infrastructure uban sa Taisei Corp ang himoon alang sa hingpit nga pagkumpleto sa maong proyekto. (BANAT NEWS)