Cortes magpabiling pambato sa One Cebu Party

CEBU, Philippines — Magpabilin nga pambato sa One Cebu Party si Mandaue City dismissed mayor Jonas Cortes alang sa Mayo 2025 nga eleksiyon.

Kini bisan pa nga nitambong si Cortes sa proclamation rally sa Partido Demokratiko Pilpino (PDP) nga gipangulohan ni kanhi presidente Rodrigo Duterte niadtong Pebrero 13, 2025.

Ang pagtambong ni Cortes nakapatumaw sa hugon-hugon nga mobalik siya sa PDP, ang partido nga nag-endorso sa kaatbang ni Gobernador Gwendolyn Garcia sa umaabot nga eleksiyon nga si Pamela Baricuatro.

 Sa iyang bahin, Si Garcia nagkanayon nga dili siya makatubag kon asa o kinsa karon ang gisuportahan ni Cortes.

Apan matud sa gobernador nga si Cortes gihapon ang nagpabilin nga opisyal nga nominado sa One Cebu pagka-mayor sa Dakbayan sa Mandaue karong umaabot nga piniliay.

Si Garcia nagpatiwala karon sa tanang kaalyado sa One Cebu sa probinsiya nga nagkaatbang karon sa lokal nga eleksiyon susama sa Mandaue diin nag-atbang pagdagan pagka-mayor si Cortes ug ang kasamtangang bokal sa ika-unom nga distrito nga si Jonkie Ouano.

“Mao na ang akong problema puro naman ni allies, di man sad ko kaiingon nga kontra nato si Jonkie, so sama sa usa ka inahan nag-away ang duha ka anak, magpataliwala ko, ug mangutana mo asa ko anang duha, ngano man diay di man ko didto sa (Mandaue) mobotar, ari man ko’s Barili”, ni Garcia pa.

Samtang si Cortes nagkanayon nga isip miyembro sa One Cebu nibarog siya alang sa panaghius ug inklusibong panggobiyerno.

Wala maghisgot ang kampo ni Cortes kalabot sa iyang pagtambong sa proclaimation rally sa PDP apan nagpasalamat kini nga siya ang giendorso ni Presidente Rodrigo Duterte.

Si Cortes kanhi kini miyembro sa PDP apan ni-resign kini niadtong buwan sa Mayo sa niaging tuig ug nisunod sa pag-resign si Garcia sa maong bulan gihapon ug  tuig. (BANAT NEWS)