Pag-aspalto sa mga karsada naa na sa 40% nga trabaho

CEBU, Philippines — Nunot sa pagpatuman sa massive asphalting ug road concreting sa dakbayan sa Sugbo, usa ka magbabalaod niangkon nga anaa pa sila sa 40%.

Niadtong Miyerkules, atol sa regular session sa Cebu City Council, giaprobahan sa konseho ang mga resolusyon ni Konsehal Jerry Guardo, Chairman sa Committee on Infrastructure sa konseho sa dakbayan, bahin sa Road Networks Completion sa Road Concreting with Drainage System sa Barangay Interior Roads, sa Hipodromo nga adunay pundo nga P9.9 milyones, ug ang Road Concreting with Drainage System nga P9.3 milyon.

Suma pa ni Guardo nga ilang giatiman ang pagkongkreto sa mga interior portion sa barangay ug kini nga proyekto gipundohan sa Department of Public Works and Highways (DPWH) ug sa Cebu City Government.

Si Guardo niingon nga subay gihapon kini sa dinaghang pagpatuman sa road concreting ug pag aspalto sa Cebu City Government, nunot sa kadaghan sa mga hangyo nga kaniadto giingong wala pa masulbad sa miaging mga tuig.

Sa pagdeterminar sa mga lugar nga sunod sa listahan, si Guardo niingon nga kini mahimong magkalahi sumala sa makatuman sa tanang requirements ug pagtugot, nga isumite dayon alang sa bidding. Dugang pa niya nga ang maong mga proyekto ubos sa budget allocations sa Local Development Fund (LDF).

Tungod kay nagsugod pa lang ang pagpatuman sa aspalto ug road concreting niadtong Oktubre 2024, giangkon ni Guardo nga taas pa ang ilang lakang aron mahuman ang mga proyekto.

Iyang gisubli nga nagsugod lang ang implementasyon sa dihang nahibaw-an sa DPWH nga adunay daghang mga hangyo alang sa pag aspalto ug road concreting nga wala pa matubag sukad niadtong 2003.

Giangkon usab niya nga ilang naobserbahan karon ang kakuwang sa mga dump truck nga magamit alang sa civil works. Sa pagkakaron, ang siyudad aduna ray lima ka dump trucks, nga gi-deploy sa matag usa sa lima ka teams. Dugang niya nga ang matag team makahimo sa paggamit og duha ka dump truck sa samang higayon sa usa ka implementasyon sa proyekto.

Matud ni Guardo nga anaa na sila sa proseso sa paghangyo sa pag-abang og dugang mga dump truck nga adunay gahin nga P100 milyones nga bag-o lang giaprobahan sa konseho. (BANAT NEWS)