Duha ka pusher nasikop sa buy bust operation sa Compostela

CEBU, Philippines — Nasakmit ang armas ug shabu gikan sa duha ka mga pusher nga nadakpan sa buy bust operation sa Compostela Police Station alas 5 pasado ang takna niadtong Domingo sa buntag Pebrero 16, 2025.

Si Police Captain Lino Tryss Gulvan III, Officer-In-Charge sa Compostela Police Station miingon nga ang buy bust gipahigayon sa Purok Philippines, Barangay Cambayog sa nahisgotang lungsod.

Ang nadakpan nga mga molopyo mao sila si Armed Jie Medillo Juntilla alyas Medio, 30 anyos ug Arnold Arthur Monroid Lawas Jr., 34 anyos nga mga molopyo sa purok 1, sitio Canlingo sa Barangay Sabang, Siyudad sa Danao apan kasamtangang nagpuyo sa Estca sa Lungsod sa Compostela.

Nasakmit gikan sa duha ka dinakpan ang 48 gramo nga shabu nga nagkantidad og P326,400.00 base sa Standard Drug Price value ug nasakmit usab gikan kanila ang kalibre 45 nga puno sa mga bala ang magazine niini.

Nasayran gikan kang Police Captain Galvan nga nakakuha sila og impormasyon nga ang duha maoy nagpasiugda og ilegal nga kalihokan sa maong lugar nga nakaaghat kanila sa pagpahigayon og buy bust operation. (BANAT NEWS)