Bishop Labajo gihimoa’g pekeng FB account

CEBU, Philippines — Nipahimangno karon si Bishop Ruben Labajo ngadto sa iyang mga kaila ug sa mga tawo nga iyang gikatransaksyon nga adunay wa pa mailhing tawo o mga tawo nga nigamit sa iyang pangalan ug naghimo og peke nga account sa Facebook.

Ang responsable sa peke nga account nanguha og mga litrato sa iyang orihinal nga account. Iyang gikabalak-an kung gamiton kini isip modus aron sila makakwarta o mga pamaagi sa pagdaot sa isi’g ka ingon.

Nagkanayon si Bishop Labajo nga delikado og adunay ma scam sa maong peke nga account gamit ang iyang pangalan.

Iyang gihangyo ang iyang mga kaila o gikatransak nga siguraduhon gyud kun kinsa ang nikontak kanila ug usa sa pamaagi ang direktang pagtawag kaniya.

Naglaraw karon si Labajo pagdangop sa mga otoridad aron mahibaw-an kun kinsa ang nagbuhat sa maong peke nga account.

Si Labajo mao ang kanhi Auxiliary Bishop sa Cebu ug karon mao ang pinaka una nga Obispo sa bag-ong nagdeklarar nga archdiocese didto sa Agusan Del Norte.— IBM BANAT NEWS