Wala idili ang walk-ins sa mga tourist destination

CEBU, Philippines — Mihimo og katin-awan si Gobernador Gwendolyn Garcia sa unang gipagawas nga taho sa news portal sa Probinsya sa Sugbo, ang Sugbo News nga gidili na nag walk-ins sa mga tourism destination sa habagatang Sugbo.

Ang maong taho nga unang gipost sa Sugbo News niadtong Pebrero 13, kalabot sa bag-ong polisiya nga ipatuman sa Probinsya sa Sugbo sa mga suroyanan sa Southern Cebu, nakadawat og pagsaway gikan sa pipila ka mga netizens.

Ang maong polisiya mao ang pagsugod sa online booking sa mga gusto mosuroy sa Southern Cebu aron mosuway sa whale shark watching sa Oslob, sardine run sa Moalboal ug mosuroy sa waterfalls ug magcanyoneering sa Badian.

Pipla ka oras human sa pagpost sa maong balita, gitangtang kini sa facebook page sa Sugbo News ug mipagawas og erratum ang news arm sa Kapitolyo. Si Gobernador Garcia mitataw nga wala nila gidili ang mga walk-ins, apan miawhag nga mas maayo gyud nga magbook sa online daan.

Matud ni Garcia pinaagi sa bag-ong online booking nga ipatuman sugod karong Marso, mapalambo niini ang experience og kasinatian sa mga turista ug masiguro ang kaluwasan sa mga bisita samtang nag-enjoy sa pagsuroy sa mga inila nga tourism destination sa Sugbo.

“kahibalo man na sila nga if modiritso na sila nga mowalk-in ra, that’s subject to the availability of slots” matod ni Garcia sa interview sa Banat News.

Ang Probinsya sa Sugbo moregulate kini sa whale shark watching sa Oslob ug sa sardine run sa Moalboal, susama sa gihimo sa canyoneering activities sa Badian.

Matud ni Garcia ang tinguha nila niini mao ang paghatag og “total experience” sa mga turista pinaagi sa pag-awhag sa mga bisita nga mobook sa mga resorts.

Pinaagi niini, siguro nga adunay kita ang mga resort operators, ug aduna pud kita ang LGU nga maoy momaintain sa mga sites, ug mosiguro sa public safety.

Usa ka ordinansa ang ipasar sa hunta probinsyal diin ilatid niini ang detalye sa pagpatuman sa maong online booking.

Apan si Garcia nagkanayon nga dili mamahimo nga mag-agad ra ang mga tourism destinations sa kon kinsa lang ang moadto sa ilang mga lugar, kinahanglan kini nga i-market pud pag-ayo aron masiguro nga adunay mosuroy. —MEL BANAT NEWS